發佈時間：19:41 2025-11-19
現年35歲的「大馬女神」林明禎，憑甜美標緻的樣子與魔鬼級身材，加上一口唔咸唔淡的廣東話cute爆，成功俘獲大批粉絲，並成為廣告界的寵兒。日前林明禎才在社交平台分享自己回馬來西亞放假休息的照片，近日秘密來港，莫非跟男團MIRROR成員Edan（呂爵安）有個約會？非也，其實是孖《飯戲攻心》導演陳詠燊出席今日（19日）在院校的電影分享會，陳導演更大讚林明禎在戲中做番自己最可愛。
林明禎笑指自己廣東話「唔得」
在電影分享會上，林明禎先分享到電影院睇戲的樂趣，她笑言在戲院和家中看電影很不同，因為家中可以食嘢、瞓覺，但在戲院可專心看戲，跟電影有交流。被問到來港發展遇到甚麼困難時，她笑言其中一項必然是學廣東話，「其實我嘅廣東話都係唔得嘅，同埋我好耐冇講廣東話，所以更差，但我會努力說。」
遇到挑戰當打遊戲機去過關
提到拍戲的挑戰，她續說：「因為我好鍾意打遊戲機，我好有好奇心，每當遇到難關，我會更想去挑戰。」她指能拍攝《飯戲攻心》覺得好幸運，收穫好多，「嗰時我聽都唔識聽廣東話，記對白要用拼音，而對白好多，當時都唔知自己講乜，惟有用自己方法rap啲對白去背、去記。」在旁的陳導演笑指：「當時如果我改佢啲對白，佢就會好驚，因為要再背過。」
陳導演大讚林明禎聰明可愛
陳導演表示當初是欣賞林明禎在電影《一秒拳王》的演出，「我記得當時我已經有《飯戲攻心》嘅劇本，但未諗到邊個做，直至我睇到明禎喺戲中做一個教瑜伽嘅導師，性格爽朗，我就覺得係佢喇。」林明禎則表示當時未有很多拍戲的經驗，所以都擔心，但陳導演表示：「第一集角色嘅人物背景其實同佢好似，我覺得佢做番自己就最可愛，因為拍頭一、兩套戲唔使挑戰自己，反而發揮所長就可以了，熟咗先去演其他角色，同埋我覺得𠱁到人笑嘅演員必定好聰明，所以我放心交個角色俾佢，我記得喺現場都冇乜教佢做戲嘅。」
疑跟Edan重遊台灣再開工
林明禎早幾年將發展重心放於香港和台灣，最初是演出香港電影《救殭清道夫》而為人認識，直至到《一秒拳王》人氣逐步攀升，至《飯戲攻心》跟黃子華合作，更大受觀眾歡迎。對於有「歌手夢」的她來說，更有機會踏上紅館，曾經擔任張敬軒《THE NEXT 20》演唱會的嘉賓之一，今年5月，她為鄭秀文澳門個唱做嘉賓。
去年11月她被網民拍得跟Edan「蜜」遊台灣夜巿，之後男方承認正力追女神，但遲遲未有下文。事隔一年，早前有網民指二人近日在社交網「離奇失蹤」幾日，並先後透露曾到訪台灣，疑重遊台灣，之後再兵分兩路開工。
延伸內容：林明禎大解放 超低胸裙晒34E身材兼4吋事業線 即獲網民Like爆
延伸內容：林明禎 Edan呂爵安 疑似台灣拍拖斷正 舉止親暱雨中漫步？
