發佈時間：12:00 2025-11-18
上周，現年58歲的蘇永康被翻出一張與女性友人的舊照片，掀起全城熱話，太太馮翠珊（Anita）在社交網上輕鬆寫道：「一早醒來，發現一個有趣的『考古』報道。記者朋友真厲害，把我們結婚前的古蹟都挖出來了！」舊照在她還沒正式成為「蘇太太」前所拍下，就是這個美麗的誤會，促成這個獨家訪問；期間，兩人暢談夫妻相處之道，更分享曾因7年之癢而一度分手，並預告未來的事業大計。
延伸內容 : 迎接結婚11周年紀念 蘇永康太太甜蜜大讚：「你魅力沒法擋！」
EQ提升
蘇永康首度開腔談「考古照」，笑言由爆出到close file都不夠8小時：「解決咗就得啦！見到有人講髮型同肥瘦之外，仲話我個樣冇乜點變，聽到都開心。」自揭EQ提升了不少：「老實講，我今年發生好多奇怪嘅事，不過都叫做控制到，可能我𠵱家個人EQ高咗，我都58歲，同以前都幾大分別。」
拍拖8年，兩人於2014年拉埋天窗，原來他們的邂逅是在陳奕迅和徐濠縈的婚禮，蘇永康大讚第一眼見到Anita覺得對方好靚：「我哋係2006年3月23號，陳奕迅結婚嗰日，第一次見面，佢因為做時裝就同徐濠縈好熟。我當時好奇怪，我身邊所有朋友都識得佢，師兄（劉浩龍）、Wyman、安仔等，得我唔識佢，我仲周圍問點解你哋個個都識佢？佢原來係徐濠縈嘅生意partner。」其後，他發現Anita出現在自己朋友圈子的時期，正正是2003年他長駐內地工作，加上當時他還未與首任妻子離婚，所以甚少出來參與聚會。
婚禮當晚，身邊的好友刻意撮合他們，Anita憶說：「朋友製造機會將我哋兩個坐埋一齊，明明唔識但就坐咗喺隔籬，又要諗話題講。」蘇永康緊接說：「好彩佢係做時裝，咁就好多嘢講。」當晚之後就經歷了一個月的長途電話之戀：「因為婚禮第二朝我要趕返福建拍戲，我好早走咗，咁我攞咗佢電話，就喺福建同佢講咗一個月長途電話。之後返嚟準備約佢去街，先同徐濠縈講，我一路有同Anita有聯絡。」
7年之癢
曾經歷過婚姻失敗的蘇永康，展開這段感情之前，就已經向Anita講明自己未有打算結婚：「傾咗一個月電話之後，我返嚟同佢講不如見面，但我好早已經同佢講，我好想開始，但暫時未有結婚打算。因為佢嗰陣30歲，我唔想嘥人時間，如果你好想結婚，我唔係對象，因為離婚冇耐。佢就話冇問題，我哋先開始。」Anita指當時自己仍後生，亦未有結婚的打算，加上兩人的朋友圈相同，亦有共同話題，所以亦覺得可以先拍拖了解。最後，兩人都拉埋天窗，蘇永康坦言：「其實（不婚）我講住先嘅啫，我一直都相信婚姻，都要大家睇耐啲啱唔啱先得嘅。」
Anita又透露，兩人曾經歷過7年之癢：「去到第7年時，我哋分開過，因為一啲好小嘅事，一啲誤會，大家分開咗半年至一年，分開咗之後，再一齊番，佢已經話想結婚啦。」蘇永康解釋：「因為覺得唔係完全解決唔到嘅原因，而分開係好可惜，終於我就同佢講番，不如我哋喺番埋一齊，今次我就想結婚啦！」
婚後，蘇永康曾想過兩公婆瀟灑過活，不生小朋友，但後來與Anita得到共識，用了一年時間嘗試，終於在2017年誕下寶貝仔Jazz，而轉眼間Jazz已經8歲。對於會否追多一個？Anita就耍手兼擰頭：「唔得啦 ！其實都有諗過，因為我哋兩個咁大年紀先生，有咩事都可以多一個人同Jazz商量。」其後遇上世紀疫情，Anita經常要到內地工作，長期處於隔離的生活，於是就錯過了生育的黃金時期。
兩人性格同樣剛強，談到夫妻相處之道，蘇永康直說：「一定係商量，冇得話強唔強勢。」他指平日太太分享工作的事，他只會作聆聽者，一定不會給予意見，因為清楚太太已經有自己的想法，只是想呻吓。而Anita則透露：「其實佢都係，所以我哋唔會傾公事嘅嘢，當我哋想講嘅時候，就要輕鬆咁去講。」
戒發脾氣
家中的大小事務，多數由Anita去安排，而令到蘇永康最深刻的是，當年蘇媽媽住在他的寓所附近，2021年老人家的身體很差，那時Anita就主動提出：「不如請埋奶奶過嚟一齊住啦。」Anita的一句話令蘇永康非常感動：「我都必須要講，我媽咪唔係咁容易相處。」蘇媽媽身體每況愈下，早前《聲秀》決賽那段時間，身體再次亮起紅燈，但Anita亦沒有打擾老公，並代他安排奶奶入院，處理好一切才告知事件，絕對是一個好老婆、好新抱！
疫情令蘇永康有一個很大的轉變：「疫情嗰陣，大家出唔到街成日困喺屋企，容易多咗摩擦，我由疫情開始同自己講，蘇永康唔好再有任何情況之下發脾氣，我係盡力戒發脾氣，因為我發現動氣係唔會幫到件事。」Anita卻指出，老公的轉變還因為兒子：「唔想喺小朋友面前嗌交，所以我哋都會好平靜咁去處理，同埋大家都相處咗19年，都知大家嘅諗法。」
子華慰問
早前，因被內地網民翻炒黑歷史，事件爆出後，蘇永康於凌晨時收到好友黃子華致電關心。其實，他當時一點也沒有動氣，但如果是20年前，他必會問：「點解，點解要針對我？人去到呢個年紀，呢個修行好似OK，唔係咁容易動氣，好大件事都係用positive嘅方法去解決，起碼一定冇影響到我工作先，呢幾年生活上有好多磨練，令到𠵱家個人EQ係好唔同。」
蘇永康又指一眾好友都有約他出來食飯：「我行出嚟第一件事，講俾佢哋聽我OK㗎𠵱家，一定係要解釋俾佢哋聽先，呢啲說話，我講過俾子華、陳奕迅、Big Four三子聽，好實在要交代嘅朋友，就係我自己最into嗰一班。」他亦看透了：「如果有人覺得到今日都未能夠接受嘅，我會尊重，呢個係每個人嘅感覺；但如果你覺得都咁多年嘞，應該放開，我多謝你嘅諗法。就算我冇出現過呢啲問題，我都冇辦法要求所有人都接受我。」他表示衷心感謝到現在仍然支持自己的人，並會努力做得更好去報答對方。
作為一個好爸爸的蘇永康，也有清楚地向Jazz解釋：「爸爸出現過呢啲問題，你唔好介意有人會唔鍾意，我一定要好清楚咁解釋俾佢聽，唔可以連面對呢件事嘅勇氣都冇，亦都冇得去逃避。」
提到教育小朋友，原來蘇永康是一位慈父 ，反之Anita坦承自己非常火爆：「我係冇耐性教小朋友，反而係佢教。」不過，隨着Jazz長大，Anita亦開始有所改變：「我嗰陣時唔知點同小朋友相處，係老公同我講：『你咁樣教唔得，等我嚟啦。』我就睇住佢教，自己又試吓。」
帶子行善
之前的暑假，蘇永康送兒子到黃埔青少年軍校體驗營接受為期7天的軍事訓練，主要是希望Jazz 學習獨立，平時經常出外公幹的Anita，就沒有不捨；反之蘇永康就表示不習慣：「我唔慣㗎，𠵱家每朝早我都會叫佢起身，睇住佢洗面刷牙換校服，我老婆話其實𠵱家係個仔陪你。」
今年4月，Jazz跟隨爸媽到內地湖南婁底新化縣，探訪了3間希望小學，全部是蘇永康父母的命名；期間，一家三口還特地為460位小朋友準備了他們所需的日用品。
時裝界翹楚好學不倦
蘇太Anita的背景強勁，曾在國際時裝品牌Alexander McQueen擔任高層逾10年，其後轉職至另一知名時尚品牌Burberry。2022年，她更開始遙距修讀英國曼徹斯特大學的工商管理碩士（MBA）課程，並於去年成功畢業。
蘇永康指太太當時非常勤力，每晚照顧兒子睡覺後，就開始做功課做到凌晨3、4點。他慶幸兩公婆能做自己喜歡的事，所以，同樣地亦會非常支持兒子去做自己喜歡的事。不過，隨着科技進步， AI的出現，Anita表示亦提早灌輸兒子，長大後要做一些AI不能取代的工作，好讓他提早為自己計劃未來。
教唱歌獲益良多
蘇永康現時自設studio教唱歌，這裏空間寬敞舒適，設備齊全。原來在4年前疫情時已萌生這個念頭，他指限聚令沒法出街，經常去一位朋友家中消磨時間；而這位朋友好鍾意唱歌，並請求他教唱歌。之後，蘇永康找自己的唱歌老師Christine Samson：「我問Christine可唔可以教我去教人唱歌，Christine又肯，之後我就zoom上堂。我都要多謝呢位朋友鼓勵我去做呢件事，同埋一班喺身邊一直支持我嘅朋友，𠵱家仲成為我嘅學生。」
目前一星期5日，蘇永康由早到晚都在studio教唱歌，但學生主要是朋友或朋友的轉介，並沒有公開收生，因為教唔切：「一對一，每堂1.5小時，自己教3堂已經散晒。」而他的學生大多是專業人士，如大律師、醫生等，最大年紀的學生則已74歲，乃學生的媽媽，他更笑說對方竟要學唱〈至少做一件離譜的事〉，非常新潮！
然而，蘇永康就拒絕教班：「有朋友開歌唱學校，佢哋話教班好賺錢，但我唔係淨係想賺錢，我想教好佢哋，加上我唔識教班，係另外一樣嘢。試過3個朋友一齊嚟學，3個人唔同水平，我冇辦法同時照顧到，最多兩公婆冇問題，但係3個人，我真係唔得。」他很感激當日朋友的啟發，令他實踐教唱歌這件事；至於擔任唱歌老師最大的得着，是令他唱歌水準保持穩定：「我𠵱家all time唱歌水準都好穩定，我諗我過往40年，最穩定係呢4年，每日都要教人唱歌，教學相長。」
早前，蘇永康為TVB歌唱選秀節目《聲秀》擔任導師，表現大獲好評，他透露是年前在林建岳博士的生日派對上，偶遇曾志偉而促成，「曾志偉過嚟話：『阿公最近搞咩？』我話開studio教唱歌，跟住佢就話可以搵我合作，直至今年初就搵我。」他續指教學生唱歌，跟要出去比賽的教學方式不同，以往他受梅艷芳、羅文的教導，學到的一切，現在亦都會傳承給學生 ，並表示見到《聲秀》學員做到他所教的技巧，非常滿足，十分開心！
完成Big Four的演唱會後，蘇永康亦計劃開個人演唱會，並透露月底將會到越南演出，12月就新加坡Big Four，而明年4月便移師去高雄。他又指現時的樂壇趨勢已經不同，以前一年一首歌，並以湯令山（Gareth.T）作例子，指對方除了熱爆的〈用背脊唱情歌〉外，今年已經推出第3首歌。而因為自己教唱歌的關係，對於新一輩歌手非常熟悉，「Big Four 4個當中，我識新artist識得最多，因為我要教，又要聽好多，幸運地TVB又搵我教年輕人，佢哋揀嘅歌都係好新嘅歌。」
