發佈時間：13:26 2025-10-28
螢光幕上，「Benz雄」許紹雄可以是「大隻廣」、可以是「方中Sir」、可以是「重案組總督察黃啟發」，更可以呢頭做完老謀深算的「歡喜哥」，轉頭又演入贅豪門的小男人「雷震」，全靠外表夠戇直，為人夠佻皮。
2017年他接受東周網的訪問時曾稱：「又真係喎，我做（演）得最多嘅，都係啲小人物同警察，壞人反而少。相由心生，連個心都呃到人：我係好人，仲要成日畀人搵笨、成日蝕底嗰隻，哈哈。」現實唔係咁咪得囉。「現實？現實我都係㗎其實，哈哈哈！」
角色往往比主角更搶鏡
從影多年，許紹雄一直都是陪着大家成長的綠葉王，而且角色往往比主角更搶、更受歡迎。「點同一線嗰啲比呀？大陸嗰啲一線，幾千萬（片酬），我就少咗個零，差好遠喎，哈哈哈！」觀眾鍾意睇咪得囉。「我懶呀，如果唔係，我𠵱家就已好有成就啦！」
實情單是在無綫，他過往便曾獲「傑出演員」、「最佳男配角」和「最受歡迎電視男角色」三個獎項了，仲話冇成就？
「哈哈哈，呢啲只係大家𠱁大家開心嘅啫！」Benz雄一臉傻笑地說。「咁幾百個人得你攞到，梗係開心㗎——唔好理佢真定假——不過個獎係真嘅、好重嘅、金嚟嘅——表面。咁講到尾，最緊要就梗係有……哈哈！」
說時，他展露出鬼馬神情，做了一個money money的手勢。「所以懶，都係我嘅優點：唔願郁，但又有錢收，哈哈哈！」而且，仲懶到可以揸Benz添。「係囉，係囉！哈哈哈！」又一副古惑笑容。得戚得佢呀。
演戲一路在中間位置
許紹雄明明是1972年入行，受訪時計落他拍戲已經拍了45年，但他卻說：「冇拍到45年！有三分二時間係等㗎嘛！頂晒籠都係拍咗一半，廿幾年啫，哈哈哈。」
這麼多年來，他襟撈、人緣好又冇投訴，故無論是電視還是電影，內地定東南亞，他總會有戲可拍，有工可開，一直專心在他的「綠葉王」位置。「我嘅演藝生涯好平，冇跌過落谷底，又冇去過好高峰，一路都喺中間。」
嚮往當綠葉王的自由
男主角，他也不是沒有當過的，1974年麗的電視，由馮淬帆監製兼執導的《碧血恩仇》，就是由他孭飛。「其實2012年，我喺內地拍過一齣電影，叫《搞掂外父大人》（實名為《搞定岳父大人》），嗰個『外父』就係我，都算係男主角之一嘅。」但他還是嚮往當「綠葉王」的自由。
「做男主角喎，梗係冇咁笨啦！咁辛苦，日日都要拍！但我唔係喎，好似舊年我拍緊《使徒行者2》，我喺深圳同北京都仲有戲拍，呢度收工，就去嗰邊開工；𠵱家我拍緊（網劇）《蝕日風暴》，我同時都拍緊套（網劇）《守護神》㗎！幾好呀，我同時間可以拍兩、三部戲，又有時間休息。」
《東周網》訪談系列節目《星桄伴我心》10月重磅嘉賓：
即睇：湯令山失戀情歌點擊破1500萬 坦認喊住唱 揭Wyman教做人智慧 爆生得唔高謎團 曾擔心生計做某件事
即睇：鍾鎮濤與范姜「姜濤戀」有火花對談 拍《巨塔之后》床上戲心得
即睇：陳煒回首離婚情傷陰霾 親授少女味保鮮心得 細訴入行30年樂與淚
立即追蹤《東周刊》全新WhatsApp頻道，緊貼全城熱話、突發猛料、獨家消息！
