發佈時間：10:00 2025-10-26
港產武打電影《九龍城寨之圍城》，叫好又叫座，全球累積票房近10億港元。除了主演的古天樂、林峯、伍允龍、胡子彤、張文傑、劉俊謙等，備受注目之外，還有一位新面孔令觀眾印象深刻，他就是飾演茶檔老闆「阿七」的喬靖夫。片中，他以雙刀擊退任賢齊，之後再血戰洪金寶，雖然戲份不多，但他表現卻非常亮眼！
現年56歲的喬靖夫，於人生的「下半場」才在影圈嶄露頭角，但原來他的來頭亦不小，不單止是填詞人，還是一位武俠小說及專欄作家；此外，15歲開始學習空手道的他，現時是一位菲律賓魔杖教練，絕對堪稱隱世高手。即使已年過半百，性格好動的他，仍然熱愛打籃球和滑板，難怪身材fit爆！
幫王菲填詞
在電影《九龍城寨之圍城》中，縱使每一位演員皆表現亮眼，但有一位新面孔仍然能夠成功突圍，他就是現年56歲、飾演茶檔老闆「阿七」的喬靖夫（原名劉偉明）。片中，「阿七」以雙刀擊退「狄秋」任賢齊，大展功架；之後，他與「大老闆」洪金寶的對打戲，硬橋硬馬的功夫，更令觀眾留下深刻印象。
喬靖夫可謂不折不折的斜槓族，不單止是專欄作家和武俠小說家，作品包括：《武道狂之詩》、《殺禪》、《幻國之刃》系列等；還是一名填詞人，作品包括：陳奕迅的〈謊言〉和〈真相〉、鄭秀文的〈緊張〉、容祖兒的〈沙堡壘〉、王菲的〈光之翼〉、盧巧音的〈深藍〉等。當年，盧巧音希望在新專輯加入新元素，於是找喬靖夫填了3首歌的詞，之後他更有機會與王菲、容祖兒、陳奕迅等合作。他表示：「寫小說同填詞最大嘅分別，歌詞除咗要配合曲調，仲要因應監製嘅要求去寫，比起小說，創作上多啲框架。」
此外，喬靖夫能文還能武，有逾30年的武術根底，最擅長菲律賓魔杖：「我自己練武術係10幾歲開始，最初係空手道，當年參加過全港比賽，攞過一次第二名，讀大專嗰陣學過詠春，後來出來社會工作，成日返夜班，冇乜時間練功，於是暫停咗練武術一段日子。直到2003年，香港開始有師傅教菲律賓魔杖，我就好有興趣去學，到𠵱家練咗超過20年。我喺2014年去到菲律賓，拜會咗我哋嗰派嘅掌門，跟佢學嘢，之後得到對方認可，仲頒咗個教練證書俾我。」雖然擁有教練資格，但他工作忙碌加上興趣多多，所以只會間中到武館教授。
問到為何會由作家搖身成為演員？他娓娓道來：「拍電影係機緣巧合，都係同我寫小說有關，因為葉偉信導演睇過我嘅小說，10幾年前搵過我去寫劇本，我幫佢寫過兩個劇本，雖然到𠵱家未拍成，但我哋就成為咗朋友。佢係《九龍城寨》嘅監製，想搵一個觀眾唔會一眼就睇得出係打仔嘅人去做，同埋想搵啲陌生臉孔，又要handle到武打嘅，於是佢就諗起我。」
作為武打片迷的喬靖夫，對於能夠跟偶像洪金寶合作，表示相當amazing：「最初搵我嗰陣冇講過同大哥大洪金寶打，直至拍攝嘅途中，先同我講下一場嘅對手係大哥大，當刻我覺得好震撼，即刻諗番起，細個睇《肥龍過江》、《敗家仔》、《東方禿鷹》、《富貴列車》⋯⋯全部都係我青春嘅一部分，𠵱家有機會同佢做對手戲，仲要係一個武打嘅對手，覺得好似發緊夢！」
洪金寶認同
問到有否得到大哥大提點？喬靖夫直說：「其實，我喺片場都好緊張，唔係好敢同一啲明星去講嘢，尤其係一啲殿堂級，我驚打擾到佢哋，所以現場都唔敢同大哥大講嘢。本身套戲有好好嘅武術指導Kenji San（谷坦健治），事前已經夾好晒，所以成個過程都非常順暢。同大哥大對打嘅時候，睇到佢其實真係好professional，因為佢已經打咗幾十年，啲功夫點樣招來招往，已經入晒骨，我同佢打嗰陣，感覺好順暢咁俾佢帶領住，完成之後，見到大哥大對我微笑，我覺得係一個認同！」
受佐敦影響
雖然已年過半百，但好動的喬靖夫仍非常活躍，除了功夫之外，亦非常喜歡打籃球，「我過咗廿歲先開始打籃球，因為睇咗《男兒當入樽》漫畫，開始迷上籃球，仲有90年代，Michael Jordan開始稱霸球壇，覺得好正，就開始鍾意打籃球。大概10年前，有一支傳媒球隊，問我有冇興趣一齊打，當時有啲驚自己唔得，因為我已經40幾歲，佢哋就話唔使驚。其實，我哋成班都有一定嘅年紀，但大家都想睇吓仲可唔可以再進步。」
至於中佬突然變成玩滑板仔，原來與疫情有關，喬靖夫憶述：「其實係因為疫情，封晒啲籃球框，冇得打籃球，諗住玩啲新嘢，睇YouTube片學，當然唔係奧運嗰啲，我呢個年紀，嗰啲花式我玩唔嚟，但有一種叫surf-skate嘅滑浪滑板，企上去䟴吓䟴吓就好似滑浪咁不斷行嚟行去，幾好玩，又可以練到core，就試吓，咁就玩咗幾年。不過，都試過撻落地兩三次，有啲都撻得幾甘㗎，撞到手腕瘀晒，但唔算好傷。」火麒麟周身癮的代價，便是周身傷！
延伸內容：林峯尾場「城寨三子」合體 「王九」伍允龍即興學跳椅子舞
《東周網》訪談系列節目《星桄伴我心》10月重磅嘉賓：
即睇：湯令山失戀情歌點擊破1500萬 坦認喊住唱 揭Wyman教做人智慧 爆生得唔高謎團 曾擔心生計做某件事
即睇：鍾鎮濤與范姜「姜濤戀」有火花對談 拍《巨塔之后》床上戲心得
立即追蹤《東周刊》全新WhatsApp頻道，緊貼全城熱話、突發猛料、獨家消息！
