發佈時間：12:00 2025-09-24
懷孕8個月，這段日子，對36歲的林芊妤（Coffee）來說，有如坐過山車般驚險，先是發現胎兒染色體疑有異常，上周就誤食生豬肉，9秒9衝去廁所扣喉。
食驚風散食到怕的她，預產期在11月，「我生埋呢胎應該會封肚，承受唔到呢種恐慌呀！」
明嘅，結婚7年，她和老公翟志榮育有6歲兒子翟德彥，4年前不幸流產，今次再陀B，又重重難關。
「今胎肥咗勁多，又容易腳腫。上一胎有好多媽咪教我食雞精，所以今胎我每日都食，因為貪佢有豐富嘅蛋白質，食咗BB健康會好啲、大隻啲。同埋老公叫我唔好偏心，要同大仔一樣，餵母乳餵到1歲幾囉！」
母愛是偉大的，值得跟她說聲：「加油！」
體重飆升
Coffee憶述懷孕初期產檢時，發現胎兒染色體疑似有問題，十分擔心，「因為就算生佢出嚟，都會夭折、早產、有缺陷之類，到後來抽完羊水知道冇事，我就放心正常活動，每日食雞精，不過𠵱家個胎夠大，開始冇食喇。」
今胎BB和哥哥彥彥一樣，非常錫她，冇乜孕吐情況，反而她因為陀得比第一胎小心，少做運動，肥得勁快。
「真係好誇張！我上一胎臨生前都係61kg，𠵱家已經係呢個數字。我原本體重48kg，有啲擔心生嗰陣可能去到70kg，𠵱家要好好控制身形，唔可以腫得太犀利，驚生嗰陣好辛苦。
「同埋因為今胎陀得比較論盡，老公對我更加呵護備至，我會『點』佢半夜起身幫我斟水，佢又唔敢叫我做粗重嘢。不過我知呢個優待係對BB，唔係對我。我人間清醒㗎！生完後就會變返做工人姐姐，要湊小朋友，哈哈！但我好享受𠵱家做女王嘅時間。」
大肚婆大晒，眼見生大仔時太上心，沒有好好坐月，所以她今次決定請陪月，讓自己好好休息。
「第一胎我落得床冇幾耐就幫彥彥沖涼、抱佢，搞到傷口發炎，個人好攰，坐月後身體明顯差咗，以前冇風癩都變咗有，仲出咗4、5年，希望今次調理番身體。」
大仔呷醋
翟家即將迎接新成員，Coffee透露大仔彥彥起初有醋意，擔心BB會分薄父母對他的愛。
「彥彥好黐我，擔心我唔要佢。我同佢講，佢係第一個出現嘅人，我已經愛咗佢6年，呢份愛係唔會變。同埋BB呢個時候嚟好啱timing，因為彥彥就快7歲，識得去處理呢個關係。
有時BB喺肚入面踢我，我就同彥彥講：『佢同你say hello，好鍾意你喎！』慢慢引導佢同BB互動，令佢變得好期待BB出世。」
她有信心彥彥會是一個好哥哥，例如有次她開玩笑指將來要拋低BB，一家三口去旅行，彥彥即刻反對：「我唔鍾意咁。」
「彥彥真係好sweet㗎！之前我哋去澳洲探老爺奶奶，期間老公plan咗去行山，開頭諗住行28分鐘上到山頂睇一睇，但上到去，老公就提議行晒成個島，要4、5個鐘，一共10幾公里。彥彥平時好鍾意行山，但當日反應好大，話唔行，點解要行咁遠？後來佢講番原來因為媽咪個肚好大，行路唔方便，中途搵唔到廁所就弊。」
小暖男的貼心行為，豈會如此少？
「行行下，彥彥執咗啲粗樹枝，俾我當枴杖撐住行，上上落落又扶住我。我相信佢係學爸爸咁照顧我，不過我淨係心心眼佢囉！」
餵哺母乳
進入倒數生B階段，Coffee指可能會「一家四口」，連埋愛犬影產前寫真。至於衫仔、奶樽等，她統統未準備。
「我諗住臨生前，先至一次過去買。如果有朋友送舊衫仔俾我，我OK㗎，因為頭幾個月，BB衫好快唔啱着。改名方面，等佢出咗世先慢慢諗。」
她續說：「上一胎好多奶，今胎我應該都係餵母乳，最少6個月，等佢免疫力好啲，睇情況啦，我覺得飲奶粉又冇乜所謂。老公就叫我餵母乳餵到1歲幾，同彥彥一樣，但對我嚟講真係好困身，我唔知呀！𠵱家我仲係好愛彥彥，唔知點樣可以愛第2個BB，淨係覺得BB會入侵我同彥彥嘅世界。」
提到她早前自爆被老公鬧，指她當年剛生完大仔，遇到口臭的士司機屈她跟有錢佬去酒店，她選擇啞忍，保護不到兒子時，她說：「其實老公係戥我唔抵！我以前覺得清者自清，蒙受好大冤屈都唔解釋，但老公教識我要敢言，保護自己，先可以保護到個仔。佢唔係為咗面子，佢清楚我為人。」
為母則強，她自言性格已變得堅強，亦有心理準備開刀生第二胎。捱一刀喎！真係要salute。
延伸內容 : 林芊妤Coffee帶兒子探索世界 唔做虎媽做好朋友
《東周網》訪談系列節目《星桄伴我心》9月重磅嘉賓：
即睇：羅毓儀淚眼訴說4段情 冧數林俊其出「七連招」追求 甜蜜剖白：我想出年結婚！
立即追蹤《東周刊》全新WhatsApp頻道，緊貼全城熱話、突發猛料、獨家消息！
