「細個被人嗌做大眼雞，唔明點解叫我做雞，chicken好ugly囉！」
在香港出世的鄧祖欣（Pamela），有「中東鍾楚紅」之稱，母親有一半沙地阿拉伯血統，父親是香港人。10年前，她從英國回流香港，正職在投資銀行工作，但最大興趣卻是做娛樂圈，主持過ViuTV節目《快樂童盟》、《傾 of the World》，又會兼職擔任婚禮司儀。
文化差異，加上與眾不同的外表，即使說得一口流利的廣東話，也令她最初不敢出街，覺得被人眼望望似怪物。但心態改變想法，現在她明白香港人冇惡意，更愛上這個地方，「可能退休先返英國了。」

父母情緒勒索

眼前的Pamela，眼大大，皮膚黝黑，廣東話卻超流利，字正腔圓冇懶音，跟她的中東外貌反差極大，講兩句更會哈哈大笑，好真性情。
Pamela現年36歲，外婆是香港人，與沙地阿拉伯外公生了她媽媽。其母在香港出世，跟她一樣生成沙地阿拉伯人樣貌，而貌似曾志偉的爸爸，則是地道香港人。
她6歲移民英國，10年前突然回流，完全為了父母。她打趣說：「佢哋情緒勒索我，逼我返來。佢哋想在港退休，話我係獨女，要跟佢哋一齊，唔想一年見一陣就分開，會好傷心，一係以後唔好見。」
父母出動到斷絕關係這一招，當時不想回港的Pamela，無奈下唯有投降，更幾乎斷送與男友的6年戀情。「我同男友講long d冇可能，返到香港一、兩年，我就會識新靚仔，忘記佢。佢好好，放棄一切跟我返港，所以我嫁咗畀佢，哈哈！」
初來香港，Pamela覺得好辛苦，經常被問：「你係咩人？點解中文咁流利？」
「我會覺得好侮辱，我係香港人，梗係流利啦！搭的士、食個飯、買件衫都要被問祖宗十八代。同爸爸出街，有時錫佢額頭，啲人又會望住，質疑佢點解同個後生女咁親密。」

夢想是做司儀

Pamela中文叻，歸功於父母在英國逼她在家中講廣東話，睇中文電視台，令她明白很多地道廣東話的意思，包括小時候在港被叫「大眼雞」，其實只是形容她眼大似這種魚。美中不足的是，她識聽識講，閱讀方面就麻麻。
以前，她會覺得中東人的外貌為她帶來不便，在香港出街欠缺安全感，但住下來，她慢慢接受，更覺得好處多過壞處。「因為呢個樣，啲人對我好奇，令我識咗好多新朋友。其實換個角度諗，佢哋問我嘢係冇惡意，同埋多咗機會去做我鍾意嘅嘢，好似做司儀、做主持咁。」
Pamela正職在投資銀行上班，同時兼顧幕前的ViuTV節目主持、婚禮和活動司儀工作、拍YouTube片講文化等等。「我演戲唔得，唱K雖然唔係最難聽嗰個，但我最有信心係講嘢，夢想係做主持、司儀，覺得自己上台會發光，畀好多心機去做。好似之前做《快樂童盟》，8個鐘得$2000蚊，我唔介意額外花多5個鐘，去將講稿嘅中文字轉拼音，逐粒字問媽咪點讀。
「我工作嘅投行老細都知我嘅夢想，我仲同佢講唔好升我職，出面好多job，哈哈！其實真係好多謝公司，畀我食得飽同有屋住。」
能夠參與幕前工作，要多得8、9年前識到伯樂喬寶寶。當時Pamela媽媽將女兒的YouTube片inbox給喬寶寶，雙方約出來食飯而結緣。「佢好好人，有時啲人請佢表演，我抱住玩嘅心態去，佢都會分酬勞畀我，我就捐去媽媽做義工嘅狗場。」

4歲仔頂心杉 

Pamela中文名叫「祖欣」，是因為其父母想她每天起床都好歡欣，而她的4歲兒子「鄭文希」，名字由來更搞笑，出於她和老公Michael中文都唔叻，貪易寫，「同埋有次我去醫院睇醫生，發現好多醫生都叫『文』；而叫『希』，係因為我鍾意陳冠希。」
她笑言全家都喜歡女，當年知道陀男B時，她躲在家中狂喊10日，當然兒子出世後，已變成她的小情人，但有時卻是頂心杉。
「佢唔知邊度學返嚟，好寸㗎！有次我叫佢唔好嘥咗個浴球，佢就叫我返工賺錢去買，我反叫佢去賺錢，佢就話：『作死呀你！我係小朋友。』佢仲成日講自己有5個女友，去餐廳食飯，又會撩啲姐姐侍應畀心心。」
今年是她和老公Michael結婚10周年，當年二人剛來港居住，賺錢不多，只在峇里島影婚紗相，一心打算留待10周年先去英國補影，所以上月他們履行承諾，帶兒子飛往英國，讓他認識爸媽成長的地方，順道拍攝YouTube片。
「阿媽當年好毒舌，話我哋10年後離咗婚都未定，但我哋捱到喎。英國係我鄉下，香港係屋企，香港人對我好好，可能退休先會返英國。」
更重要的是，香港有更多機會讓她追夢。聰明人，當然識揀。