發佈時間：09:19 2023-09-29
近年成功突圍的玄學家七仙羽，憑着唔鹹唔淡的廣東話，加上鬼馬的演繹，順利搶灘。除了參與電視節目、拍電影之外，又不停出席商業活動，更紅透廣告界，差不多每個月都有新廣告出街，其門如市。
縱使經常曝光，但七仙羽依然不斷為大家製造驚喜。日前為一中成藥品牌拍攝廣告時，她瞓身大玩馬姐、Barbie girl、上海婆look等。期間，她還大拋媚眼、瘋狂扭身扭腰，盡情發放妖艷風騷的一面，令廣告客戶也不禁直竪拇指！
驚喜造型
日前，玄學家七仙羽（七師傅）現身觀塘，為一個逾四百年歷史的本地中成藥品牌拍攝廣告。據知，品牌的新生代接班人是她的小粉絲，加上見她形象鬼馬，正好為品牌帶來新鮮感。當日，七師傅由早上十一時拍至晚上十一時，踩足十二小時，全日換了四個造型，包括︰馬姐、上海女郎、Barbie girl及皇帝，而每個look都一個比一個驚喜，玩味十足！
現場所見，七師傅先紮了兩條孖辮扮馬姐，繼而跪在地上辛苦抹枱，同時還要聽從老爺的吩咐煲藥，忙個不停。熱身過後，她又換上旗袍，化身成美艷動人的上海女郎；期間，她一邊拿着喱士黑扇，一邊扭着身軀兼大擺蘭花手，加上迷人雙眼和嬌媚地講對白，盡展風情萬種。承接劇情延續騷味，她馬上戴上金色長假髮扮 Barbie girl，再手持裙襬，加多幾錢肉緊地狂扭腰肢，可謂將全身的騷味大爆發。最後換上皇帝造型，這時她才回復正經。
由於廣告需要演繹騷味，七師傅直言事前在家有做功課：「我都好鍾意今次啲造型，我對住老公練習風騷，利用眼神，不停對住佢眨眼；但就嚇親佢，反問我搞乜？始終我同老公一齊好多年，啱啱拍拖就會浪漫啲，𠵱家就老夫老妻。」
想扮壞人
七師傅坦言能夠促成這次廣告合作，皆因認識該品牌多年；另外，她也親自服用，覺得有信心才接拍。事實上，這幾年七師傅成廣告界新寵兒，不同類型的產品，例如：保險、銀行、手機、電訊、油站、樓盤等都有份，就連明年的廣告預約也不少，接job都接到手軟。而她就期望有新嘗試：「我現實中係好人，所以好想扮演壞人，試吓演江湖大家姐都唔錯。」近年收入大增，但家底雄厚兼一直修行的七師傅，坦言會將所賺的錢，大部分作功德之用，搵得多捐得多。
