發佈時間：13:03 2025-07-07
昨晩播出的《女神配對計劃》第五集，李芷晴（Stephanie/Step）組的三位求愛勇士分別為年薪超過80萬的「怕醜仔」金融分析師林焌堯（Jacob）、陽光型保險經紀劉偉強（Isaac），及貼心西裝店老闆陳昇（Jaden）。三人之中以「怕醜仔」Jacob最為搶焦，他與女神撐枱腳時，全程Dead air，還數度拒絕同女神有眼神交流！
阿Bob激動到掟耳機 去約會現場救駕
面對Jacob的超級怕醜，主持兼媒人林盛斌（阿Bob）就非常肉緊，眼見Jacob主動將機會轉贈對手時，阿Bob連珠爆發謂：「你話死唔死吖，有冇嘢問喎」、「問你呀，你問咩人哋啫」，之後在第一回合結束後，阿Bob更馬上嚴師上身向Jacob訓話：「Jacob，你嘅時間嚟架嘛，你問佢哋有咩想問？你冇嘢呀嘛？等陣佢哋有機會架啦！」而當見到Jacob再反高潮地轉撩對手傾偈時，阿Bob直頭激動到掟耳機兼一支箭標去約會現場救駕，而花生團的江美儀及黃嘉雯亦忍不住大表肉緊謂：「叫佢唔好再咁喇。」
Jacob一句「楊枝甘露妹妹」氹掂女神
Jacob雖然怕醜，但對芷晴都充滿誠意，當他知道自己入組芷晴隊後，就認真地狂煲Step在《愛‧回家之開心速遞》中的戲份、還大讚Step飾演的Elaine好好睇，令Step大為Impressive，Step更因而自揭：「Elaine其實應該係有八至九成都係我嚟。」而在之後為Step改「情侶匿稱」的環節，原本率先答題的Jaden及Isaac已給出了極冧滋答案，豈料威力卻不及Jacob的「楊枝甘露妹妹」。
雖然「楊枝甘露妹妹」聽落莫名其妙，但原來靈感是來自Step《愛‧回家》其中一個角色，Jacob說：「我睇咗佢有一集《愛‧回家》，係佢喺吳多國嗰度做人哋Assistant，個角色叫楊枝甘露，嗰個角色令我覺得好冧，可愛得嚟又好純情。」
對於Jacob為了自己狂煲《愛‧回家》，Step坦言很窩心：「可能其他人係未必知（我有個咁嘅角色），嗰吓我會覺得係『得我一個知道你講緊咩』，我就有啲心動，我會覺得：『嘩！點解你會記得嘅？』…佢真係有留意李芷晴嘅嘢，我有嗰種被放咗喺心上嘅感覺。」被Jacob的真摯、傻氣及靦腆深深吸引的芷晴，飯局期間還一再為Jacob打氣，互動相當甜蜜！
延伸內容 : 女神配對計劃︱李芷晴同周嘉全認識7年冇Feel 無悔拒愛
延伸內容 : 女神配對計劃︱李芷晴被爆同《愛回家》兩食家談戀愛 踢爆同許家傑密會斷正
延伸內容 : 女神配對計劃︱周嘉全喜歡李芷晴有原因 星途不順 靠做司機幫補生計
延伸內容 : 李芷晴演《愛回家》Elaine夠入屋 新戀綜節目公告單身配對搵男友
