發佈時間：16:15 2025-06-16
38歲TVB藝人張振朗（Owen），今年憑劇集《反黑英雄》成三料視帝。日前他為新劇《刑偵12》接受商台訪問時，他憶述月入只得幾千蚊的日子，連叫杯凍飲加兩蚊都唔夠膽，幸得家人經濟支持，亦透露2019年劇集接連被抽起及連環受傷黑仔到爆。提到與女友楊偲泳相戀6年，張振朗表示與對方互旺事業越來越好，信命的他說：「我哋擺明係運氣夾，直情係護身符！」
投考藝訓班入行
張振朗2006年參加英皇新秀，並於2011年再次投考藝員訓練班而入行。有「翻版張智霖」之稱的他，14年來由跑龍套開始，經歷「地獄黑仔王」階段，直至2015年主演《愛回家2》後收入才開始穩定，今年更終於捱出頭憑《反黑英雄》成三料視帝。
藝人朋友請食飯
回想那段月入6千蚊的日子，他表示︰「凌晨將軍澳收工最辛苦，坐公司車去旺角轉紅Van，返到屯門仲要行好遠先返到屋企。當時起居飲食都唔夠錢，好記得沈震軒帶我去食日本拉麵，我一望餐牌，咁貴點算？或者佢睇穿我，於是話『我請你啦』；又有一次同朱敏瀚、樂彤去食嘢，又係見到菜單好貴，佢哋都係講咗一句『我請你啦』，好記得呢啲畫面，當時我連凍飲加兩蚊都唔夠膽，事關第二日食飯，可能就係爭呢兩蚊。」
張媽媽經濟支持
張振朗十分感恩家人多年來支持自己追夢，他說：「阿媽幫得最多，我一定有唔好意思，嗰時都20到尾大個仔，但阿媽係無限量支持我，佢曾經都問我需唔需要考慮將來轉行。當佢知道我好想繼續演戲，就繼續無條件支持我，因為冇人估到我近5年嘅轉變，所以都會擔心我，但起碼到咗今日，我冇令阿媽失望。」
被稱「地獄黑仔王」
張振朗6年前曾被封為「地獄黑仔王」，連續5套劇被抽起、拍劇時又多次受傷，甚至要即時送院急救。他記得當時正在拍攝《反黑路人甲》，他直言︰「嗰幾次受傷係好恐怖，而且嗰啲劇朝早話播，到晏晝又話唔播。嗰時我都諗，唔通個天覺得我唔啱做呢行？好彩我個人好樂觀，會認為自己好彩，例如我會諗如果啲劇當時播，或者會畀人鬧到反艇喎；嗰兩次嚴重意外，如果我真係黑仔，有可能瓜咗喎；個Cam跌落嚟嗰次，有可能毀容喎，好彩只係中膊頭！我知道凡事向好方面諗，好嘢自然會埋嚟。」
楊偲泳成「護身符」
張振朗自與楊偲泳拍拖後，相戀這6年來，二人事業一直穩步上揚。他認同跟女友互相催旺事業︰「我哋擺明運氣夾，直情係護身符咁，哈哈！」並表示兩人關係穩定，現不急於結婚，「我到𠵱家都鍾意同屋企人住，而且𠵱家關係好舒服，但要等多一陣，因為我同佢都係衝刺緊。不過我哋係好Chill嗰種，突然之間聽日做（結婚）都唔出奇。」
努力儲錢購獨立屋
張振朗又指入行至今的目標都是儲夠錢置業，購入一幢4層兼8人同住的獨立屋，能與父母及哥哥一家四口同住。他笑言︰「佢哋6個之外仲有一個係邊個呢？哈哈！」張振朗認為偕另一半與家人同住，都不會失去二人世界空間，皆因家人凌晨瞓晒覺後，便自然有私人空間，所以現在要好努力搵錢。
延伸內容：刑偵12丨林保怡激讚張振朗好演技 一提前拍檔王喜遭迷姦 反應係......
延伸內容：台慶頒獎禮2024｜張振朗憑《反黑英雄》奪「最佳男主角 」成雙料視帝
《東周網》訪談系列節目《星桄伴我心》6月重磅嘉賓：
即睇：75歲翁倩玉爆初戀情人秦沛畫卡通追求 隨緣孤身走情路 紅着眼憶重病父 為見愛妻堅持站起來
