發佈時間：10:00 2025-06-15
現年45歲的王祖藍，早年成功開拓內地市場後，便一度將基地北移，又參與政事，晉身成為廣西政協。一向熱衷家鄉活動的他，日前不單止首度在維園舉行的「家鄉市集嘉年華」中擺檔，還拖埋老婆李亞男和兩個女及外母撐場。
向來有生意頭腦的王祖藍，在自家攤檔做生招牌吸客之餘，又力谷由老婆製作的曲奇餅，結果反應非常熱烈，搞到他笑言可以「食軟飯」。
王祖藍李亞男結婚10年
2015年，王祖藍與2005年華姐冠軍李亞男的「長短腳之戀」修成正果，婚後誕下兩女，分別是現年6歲的長女王天韻（Gabby），以及4歲的細女王海靜（Hayley），一家4口幸福滿瀉。
轉眼間，今年2月已是兩人結婚10周年，王祖藍安排了一個驚喜旅行給老婆，欺騙她去東北，實則是重遊當年結婚的馬爾代夫，令李亞男留下深刻的印象。
向來顧家的王祖藍，不僅抽時間跟老婆過二人世界，亦會幫手照顧兩個女，除了帶她們到公眾遊樂場之外，還光顧平民小店，生活「貼地」。去年，他曾帶兩女去維多利亞公園的家鄉市集嘉年華，挑戰100元食勻全國美食，更歎埋鮑魚。由於他熱衷參與這些家鄉活動，日前該市集再度開鑼，他今次更「升呢」做老闆擺自家的攤檔，還一家四口連同外母現身撐場。
市民前購物打卡產品大賣
現場所見，王祖藍開設的攤檔外，擺設了他的人形紙牌，主打賣3樣他的心水美食，包括︰曲奇餅、蝴蝶酥及咖喱魚蛋醬。縱使天氣炎熱，兩公婆都落力在檔前推廣，而兩個女則拎出曲奇餅讓人試食，非常之落力，絕不像「公主」。全家同心，齊齊吸金！
王祖藍笑言︰「第3年過嚟，平時都係叫我嚟行吓，今次就整檔玩吓，搵我老婆畫嘅畫，設計做成曲奇餅罐，既有美食又美麗，而且係佢幫小朋友畫嘅畫，充滿愛嘅食物就係最好⋯⋯好感謝市民、鄉親蒞臨支持，有啲一箱一箱咁買，開賣兩日都差不多售罄。」現場相當熱鬧，有不少市民前來購物和打卡，結果產品大賣，王祖藍一家忙個不停，難怪他打趣說：「咁我可以『食軟飯』啦！」
延伸內容：猜猜他是誰? ｜ 小時候好醒目 長大後吸金力好強 !
《東周網》訪談系列節目《星桄伴我心》6月重磅嘉賓：
即睇：75歲翁倩玉爆初戀情人秦沛畫卡通追求 隨緣孤身走情路 紅着眼憶重病父 為見愛妻堅持站起來
