發佈時間：13:54 2025-05-15
現年同是58歲的黃澤鋒和太太陳麗麗（妃媽），於2019年以52歲高齡誕下女兒黃熙恩（小黃妃），一度成為熱話。日前，一家三口又開心公布有喜，妃媽經台灣人工受孕，以超高齡懷上第2胎，現時已佗B女5個月，預產期是9月，這則喜訊震撼全城。
誕下大女時，妃媽一度因妊娠毒血爆發，導致血壓飊升險中風，徘徊生死之間。今次再懷孕同樣辛酸，她試過小產，用了12小時才排除體內的血塊；此外，她打排卵針又打到肚皮黑晒，還打了過百支安胎針。至於，快將再做爸爸的黃澤鋒，不單止變身「廿四孝老公」，身為家中經濟支柱的他，為搵奶粉錢，除教游水外，他還教泰拳和參與演藝等工作，密密搵錢，他坦言：「一星期做足7日。」
58歲超高齡再度懷孕 生死一線
黃澤鋒的太太陳麗麗（妃媽）以58歲超高齡再度懷孕，引來全城熱議，正負評各有。日前早上，兩公婆駕車送5歲的大女黃熙恩（小黃妃）返幼稚園；期間，小黃妃由爸爸抱着，妃媽雖然已有5個月身孕，但手腳依然纖幼，她說：「今胎係肥胎不肥人，反而佗妃妃時有水腫。」而小黃妃得知當上家姐，也表現得十分雀躍，又輕撫媽媽的肚子，一家人對即將到來的小生命，充滿期盼。
兩夫妻送完小黃妃返學，便到快餐店食早餐，黃澤鋒負責捧餐回來，還為老婆的熱飲加糖，細心體貼。途中，由幼稚園的家長到周遭的街坊，都主動向他們問候及送上祝福。
由於高齡懷孕，風險較高，妃媽誕下大女時，一度因妊娠毒血爆發，令她血壓飊升而險中風，生死一線之間，幸好經開刀順利「卸貨」。為何再次「搵命搏」？她表示生完第一個後，一直考慮再追多一個，加上小黃妃返學後，見身邊的同學仔有弟妹，於是不停懇求父母再添新成員，故夫妻便採不設防措施。至2023年底，妃媽發現「有咗」，但僅歡喜了11周，卻出現小產狀況。妃媽坦言：「我可能操勞影響，最終食咗藥，用足12小時排除體內嘅血塊，排完發現輕咗4公斤。」
決心追B 台灣人工受孕
決心追B的妃媽，經中醫調理身體後，再獲醫生轉介到台灣接受試管嬰兒，花了半年及20萬元，終成功懷孕，但過程絕不容易，她憶說︰「因為老公見針就驚，我咪每日自己喺肚皮度拮排卵針，打到個肚皮黑晒，之後又對住塊鏡喺pat pat位，打咗過百支安胎針。我亦聽話跟足醫生指示飲食，唔食皮、紅肉、生冷嘢等，但佗呢胎就冇嘔。」現時妃媽都定期進行檢查，又自己早晚量血壓，留意胎兒的情況，完全無礙。
看着老婆辛苦追B的黃澤鋒，不諱言︰「佢第一次生B時，已有半隻腳踩落鬼門關，今次嘅經歷都好痛苦！其實生仔，作為男人，真係乜都做唔到。大肚婆情緒會大起大落，我可以做嘅係陪伴，我覺得女人係有兩種專利，就係小氣和野蠻，我咪忍咗佢。」
除默默支持老婆，讓她安心安胎外，身為虔誠佛教徒，並「顯密雙修」的黃澤鋒，每日都會在家中的供佛房做早晚課，保全家平安；另外，他還肩負養家的重任，每日開工冇停手，「我有泳會，一星期做足7日。我一早叫佢哋起身，跟住同老婆送女返學、食早餐、買餸、接放學，跟住下晝去教游水，收工返屋企煮飯，我冇休息，但我唔覺辛苦。錢唔夠，咪去搵咯。」除教游水外，他還教泰拳和參與演藝等工作，密密搵錢。
夫妻同心 反擊負評
黃澤鋒一家開心報喜，但卻惹來網民惡意攻擊，指父母將來會成為兩個女兒的負擔。兩夫妻強調再生B是經家庭會議後，共同的決定，有晒全盤大計；加上兩公婆勤做運動，一直保持身體健康，所以照顧多一個絕對沒有問題；而夫妻的終極目標，當然就是見到兩個女長大成人。
就外界針對兩代年紀相距太遠，黃澤鋒透露自己也是過來人︰「我阿媽都係40歲生我，佢95歲走，陪咗我55年，都見證到三代同堂。當年我20歲去無綫簽約，因未夠合法年齡，要帶埋阿媽去，當時有人叫我阿媽做『婆婆』，我咪解釋係我媽媽，我都唔會理啲人點睇。」一家人調節好心態，對負評無懼︰「最緊要我哋一家齊心，妃妃都話：『我哋生BB係我哋嘅家事，關啲人乜事呀？佢唔係我哋屋企人。』」
由於細女尚有4個月便出世，黃澤鋒一家都十分期待，妃媽指小黃妃也高興自己「升呢」當家姐︰「我哋有教妃妃要做家姐嘅本分，妃妃話會幫手餵奶、換片、做家務，又會同妹妹一齊玩。妃妃計過自己生日過後，妹妹就會出世，叫咗我哋到時帶埋妹妹送佢返學同放學。」訪問當日妃妃都講︰「我會錫妹妹。」一家人有愛團結，任何的阻礙，自會迎刃而解。
《東周網》訪談系列節目《星桄伴我心》5月重磅嘉賓：
即睇：魯振順八級鋼琴，出過唱片，手揸兩層樓 曾割脈斷9條手筋：「我對唔住媽媽！」
即睇：陳國邦被評為「懷才不遇之星」：係咪真係去擦鞋就得？爆杜琪峰出一招教戲 再爆同周秀娜接吻感受 更爆羅敏莊曾離家出走
