發佈時間：14:37 2025-05-12
常言道：阿媽唔易做！為人母親，除了懷胎10月，仲要眠乾睡濕湊大粒心肝椗，所以每年一到母親節這個大日子，全世界子女都歌頌母親偉大，高唱真的愛妳！
城中靚媽林芊妤（Coffee）和前女子組合2R成員黃婉君（Rosanne），自為人母後，全副心機和精神都放在兒子身上，除了悉心照料，更不時帶着他們四處遊歷，用小眼睛看大世界。近日兩位靚媽又帶兒子去探索世界，她們接受《東周刊》訪問時，更大談為人母親的苦與樂，但她們都說夠能看着兒子一日一日健康成長，即使再辛苦也值得！
馬爾代夫親子遊
林芊妤（Coffee）於2018年與圈外男友翟志榮結婚，並誕下兒子翟德彥後，多年來常常在社交網分享和兒子的互動，無論工作還是親友聚會中，都常常看見其兒子的成長片段。每當有長假期，她總會帶兒子出埠，讓他探索不同的新事物。
今年Coffee在母親節前的復活節假期，和丈夫又帶兒子到馬爾代夫旅遊。「我同老公唔係話特別鍾意馬爾代夫，但有次同彥彥講開有啲海嘅海水係透明，可以見到水底啲魚，佢一向鍾意小動物，聽完我講就好好奇又好興奮，所以今次就帶佢去睇吓。」
在馬爾代夫的7日6夜，Coffee和丈夫帶着兒子四圍探索，更不時拍下他的鬼馬動態，記下他的成長印記，「嗰幾日睇見佢啲得意表情同開心嘅樣，已令我有好大滿足感。希望喺佢成為大人前，製造更多一家人嘅共同回憶。」
母子之間相處像朋友
為人母親多年，Coffee笑言母子之間相處就像朋友，「我平時同佢係平起平坐，似朋友多過似佢阿媽。雖然佢有時佢都幾百厭，但只係搗蛋嗰隻，唔係做啲乞人憎嘅行為，同埋佢知道自己做錯事，會俾個好cute嘅笑容對住你，等你嬲佢唔落，呢個係佢嘅殺手鐧。」
她續說有時兒子的行為也令她哭笑不得，「有次去camp 彥彥激嬲我，我就唔同佢傾偈，點知佢執咗條樹枝，整咗隻戒指，行埋嚟幫我戴上𠱁番我，嗰刻真係好冧。又有一次老公教佢一齊嘲笑我，激到我暱入房喊，彥彥就好暖男咁，入嚟摸吓我塊面，又幫我抹眼淚，仲逼我攬住佢。我同佢講話『我生你出嚟，咁錫你，咁辛苦湊大你，唔可以咁樣笑我。』點知佢立即眼濕濕，話好內疚，仲話自己唔應該同人哋（爸爸）一齊笑我，聽見真係覺得好sweet。」
Coffee唔做虎媽 教仔自由式
Coffee笑言自己不是虎媽，教導兒子會採取比較自由的方式，讓兒子自己摸索，「彥彥今年6歲，讀小一，我好少管佢，因為覺得小朋友應該要自己培養獨特嘅性格同責任心，唔可以管得太多。好多家長做任何事都永遠覺得自己啱晒，要小朋友聽晒自己話，但小朋友雖然只係一張白紙，但諗嘅嘢未必比大人差。有時阿仔都會諗到一啲我諗唔到嘅嘢，甚至處理嘅方式比我更好，所以我會傾向聆聽小朋友多過去管佢。」
談及母親節將至，Coffee透露每年都是一家人簡簡單單食餐飯，「都係同媽咪、阿嫂一齊食飯，其實我覺得節日食乜？有乜禮物？點樣慶祝？都唔緊要，最緊要係一家人一齊過。」她又說自兒子懂事後，每年在母親節也送她小手作，「彥彥年年都做啲小飾物，上年係塊鏡，又有手鏈，間中又會畫畫，話媽咪幾好幾好。到母親節正日，又會大方奉獻私己錢請全家人食飯，當然我會就住佢個荷包仔，唔會食得太貴。見到佢懂得付出同孝順父母，作為阿媽已經覺得好滿足，每年母親節我都好開心㗎，但佢阿爸嘅父親節呢，就得一支雪糕。哈哈！」
