發佈時間：01:45 2025-04-06
現年43歲、2005年港姐冠軍葉翠翠，與年長6歲的建築師周曉東（Raymond）結婚9年，二人育有三子，葉翠翠於2017年提早跟TVB解約後，便轉投KOL事業，有傳其月入高峰期賺七位數。葉翠翠和丈夫多年來住在市值9千萬元、實用面積達2,836平方呎的獨立屋，一家人十分幸福，但原來家家有本難唸的經，近年葉翠翠家中發生很多事，而她又兩度受抑鬱症折磨，興起輕生念頭；而細仔和丈夫亦曾患上大病，令無助的她思疑家中有鬼，找上捉鬼師傅援助。
生仔生得太密患抑鬱 萌輕生念頭
葉翠翠剛接受資深傳媒人汪曼玲訪問，葉翠翠坦言近年兩度受抑鬱症折磨，第一次是2020年幼子出生後3個月：「過去幾年生小朋友生得好密，個腦都未準備好，生完第三個小朋友之後三個月就搬屋，又要搬嘢，同時又要工作，突然發現自己無故會坐喺度喊，有時唔諗嘢都會喊。覺得好辛苦，人生冇意義，持續咗半年，每日到小朋友下晝瞓咗覺，就會入廁所鎖埋門坐喺地下大喊。最嚴重嘅時候，曾試過攞輕生工具，又試過喺浴缸放水，已諗好晒成個畫面。」
葉翠翠因不捨兒子放棄輕生
葉翠翠坦言在準備輕生之時，幸好當時都諗起三個年幼的兒子而頓時放棄自殺的念頭，葉翠翠說：「有日我喊咗好耐，突然諗到我咁樣走咗，我個仔咪唔記得我？之後又過一日，我又諗到唔單止細仔唔記得我，大嗰兩個只得兩、三歲，佢哋都唔會記得，咁我咁辛苦生三個為乜？所以我決心要起番身。如果嗰個狀態維持多幾日，我應該就冇（死）。」葉翠翠當時用做運動去治療抑鬱，經過半年時間，終於成功治好抑鬱症。
葉翠翠信錯人 損失慘重致二度抑鬱
但到兩年前，葉翠翠又因為信錯人損失了一大筆金錢而再次患上抑鬱症。葉翠翠說：「當時我錯信一個人，累我損失咗天文數字，唔止一百幾十萬，而係好龐大嘅數字。我當時心理好唔平衡，我咁辛苦去工作，因為係人哋嘅錯蒙受咁大損失，除咗冇咗好多錢之外，要搞番好件事承受咗好大壓力。」當時葉翠翠每晚都做直播，會有時不由自主地哭，有不少粉絲都察覺到她神情有異。她能捱過第二次抑鬱，原來正是靠粉絲：「第二次低潮係靠粉絲捱過。當時我一定會做直播，道理同運動一樣，我話畀自己聽一定要做到，唔係就咩都做唔到。」堅持直播，將葉翠翠帶離陰暗的道路。
葉翠翠自責「發瘟」半年 累細仔變長期病患者
葉翠翠克服第一次抑鬱後的數個月，就到細仔出事。葉翠翠表示當細仔出世之後一段時間，她就覺得兒子出現問題，但告訴老公之後，丈夫卻認為只是她多疑。到細仔約1歲零3、4個月，就有一位中醫說細仔有問題，她立即帶細仔睇醫生，醫生當時表示如果再拖，就去到不能逆轉的地步。當時細仔要即時入政府醫院治療，並且要做手術，曾插到周身喉令葉翠翠十分自責。她認為自己若非「發瘟」了半年，就可早一點帶細仔睇醫生；她又表示：「所以我既自責又怪責伴侶，點解佢唔認真咁睇個仔一眼？」醫生就對她說，幸好她鍥而不捨地醫治細仔，不然細仔很可能會失去性命，故此勸她不要自責。葉翠翠指，現時細仔已變成長期病患者，需要經常出入醫院。
葉翠翠丈夫一度病危 以為屋企有鬼
當細仔過了半年，病情總算穩定下來，葉翠翠以為可以鬆一口俘氣之時，竟然又輪到丈夫生病。葉翠翠表示：「當時係年尾，我發覺老公面色好差，就叫佢去入醫院檢查，開頭佢仲話自己冇事。點知驗完，醫院就叫佢立即入院，當時他入院係以月計，所以我就有埋焦慮症。」當時葉翠翠和內地某醫生取得聯絡，有意將丈夫送到內地醫治，但最後打消了念頭，因為當時丈夫的情況已差到捱不過隔離的日數。
葉翠翠道：「因為當時疫情，去內地需要隔離21日定14日，嗰個醫生同我講，老公根本捱唔到個隔離日數」。最後丈夫留在香港醫治，幸好大步檻過。葉翠翠補充：「嗰陣屋企發生咁多事，我直頭覺得屋企係有鬼，我真係搵咗個捉鬼師傅上嚟，但佢話我屋企冇（鬼），所以我都安心些少。」
