發佈時間：12:00 2025-04-02
匆匆人生，由無數的歡聲與淚影交織而成。
今年初的台慶頒獎禮，楊卓娜憑劇集《黑色月光》競逐最佳女配角，雖然最後大熱倒灶，但最近她在《奪命提示》中飾演清潔女工娟姐，再被網友評為天花板級演技。
劇中的娟姐，因放不低死去的兒子而精神受創；現實中的楊卓娜，同樣經歷過死別之痛。
楊卓娜年僅4歲喪父，繼父亦於她20歲時病逝。每當提及亡父，她都泣不成聲。
「我由細到大都好缺乏父愛，但以前會好刻意去忽略，漠視內心的真正感受，以為自己唔需要，有媽媽就夠了。當失去咗，才發現原來好渴求得到某個人的愛和認同，但呢個缺口，已經無法彌補，嗚……」
愛得太遲的傷痛，有如千支針插在心，令她被抑鬱症纏繞多年。
「我覺得自己好似一條毛蟲，困咗喺個繭入面，好想衝出去，卻無能力去敲破呢個繭。」
眼淚，留下了遺憾，也換來了珍惜，令她與母親及胞妹楊茜堯的感情更親密，亦令她在遇上「廣告燈箱大王」楊志翹時，更懂得去愛。
「當年佢經歷了喪妻，我經歷了喪父，係信佛嘅佢教我學習釋懷和放下，佢係我嘅人生導師。」
有些愛，不可以重來。但每一段經歷，都有如一級階梯，讓她踏得更高，看得更遠。
我的父親
鬢起孖辮，穿上超短牛仔褲的楊卓娜，與《奪命提示》中精神萎靡的「娟姐」，判若兩人。
但在一小時的訪問中，每當提起對後父劬勞未報的遺憾，她那把讓人揪心的哭聲，又與娟姐有幾分相似。
「我不是科班出身，但每接一個角色，我都會先用心去感受佢係咩人。娟姐呢個角色，化老妝只係表面，表達那種生命俾佢嘅折磨、好想搵個窿去收埋自己嘅滄桑感更加重要。加上我曾經有情緒上的創傷，或者人生經歷係幫到我演繹得更細緻。」
她的人生經歷，要由4歲喪父開始說起。但話題剛起，她已忍不住潸然淚下。「……sorry，其實我好怕講屋企，好怕講自己……」
哭了近分半鐘，她才能忍着淚說下去，「我好細個，親生父親就走咗，所以我對佢無乜印象，讀書時如果要寫『我的父親』，我會逃避，會同老師講改為寫『我的母親』。」
三母女相依為命，為減輕母親的工作負擔，原名楊娜的她，會和妹妹楊怡（現已改名楊茜堯）一起幫母親倒垃圾、派傳單，家中每逢屋漏，更是由她一手一腳裝修。
「當年為咗慳錢，屋企所有破爛都係由我去處理，剷灰、髹油，我乜都識。不過細個覺得好好玩，見到崩壞嘅屋企，由一家人夾手夾腳去修理好，那份滿足比任何嘢都珍貴。」
母親因無法獨力照顧兩姊妹，偶爾會將她放在姨媽家寄宿，「有時去大姨媽度住，有時去細姨媽度住，初初都會唔開心，就算姨媽係親人，但要我去一個陌生嘅地方，一住就住半個月，有時住1、2個月，始終唔慣，不過當時都無得揀，惟有跟住表哥表姐去玩。」
繼父的出現，令一家人的生活得以改善。然而提起繼父，她又是淚流不止。
「繼父好傳統，對我特別嚴厲。我同佢關係唔好，甚至想過離家出走。直至佢重病離開，我才發現好在意佢，只係性格倔強，唔識得表達……有啲創傷係無形嘅，我情緒咁波動，唔係因為我缺失咗咩，而係我發覺我好愛佢……」
姊妹約定
因為失去過，令她更重視親情，尤其與胞妹楊茜堯的姊妹情。「我和阿妹同常人一樣會嘈交、打交，仲試過互掟拖鞋添，但每次同爸爸有咩爭拗，阿妹都好撐我。好正㗎我個妹，大家見佢好硬蹦蹦，其實都係一種自我保護，尤其是做娛樂圈呢行。而我嘅自我保護方式，可能係搵個罩去罩住自己。」
兩姊妹的情感，在吵吵鬧鬧中堆積成長。說起去年12月發生的一件事，她再次激動至淚如雨下。「後父的死忌是聖誕前後，舊年12月我剛自國內拍完劇返港，就約咗阿妹一齊去拜祭佢。途中因為我揸車揸錯路而遲到，而阿妹之後又要趕住去開會，所以大家通電話時就有啲爭拗，講咗啲互相傷害嘅說話。當我到達落車嗰刻，阿妹即刻走埋嚟攬住我，因為佢覺得自己講咗啲說話hurt咗我，嗰刻我哋兩個攬住一齊喊……姊妹就係咁，無論講錯咩說話，都唔會有隔夜仇。」
說起妹妹早年與她的一個「約定」，本已制止的淚水，又再奪眶而出。「有次傾偈，我哋好懷念細個一齊成長的日子，雖然唔富裕，但係好開心。跟住佢話：『家姐，我約定你，我哋將來要住埋一齊，就算唔住同一間屋，都要住隔籬屋……』」
一紙婚書
這個約定，楊卓娜一直銘記在心。如今她已和「燈箱大王」楊志翹組織五口之家，妹妹亦與羅子溢育有一子一女，兩家人近年愈住愈近，且常有聚會。
09年一次睇中醫，醫生診斷她患上抑鬱症。她坦言認識丈夫楊志翹後，性格變得開朗，更視他為人生導師，助她開啟智慧。「近年好興玩16型人格，我係INFJ（以直覺主導的內向型），而我老公就係ENFJ（以情感主導的外向型），原來我同佢啱啱一凹一凸，正好互補不足。」
她欣賞丈夫從不帶負面情緒，為人幽默、體貼又細心。「當年同佢剛拍拖，佢知我人工奀無乜錢，成日會送啲小禮物如水晶、電話繩、公仔掛飾俾我，又會買衫同袋俾我，仲試過唔出聲靜靜放2萬蚊入我銀包。
「我好懶，牙刷無晒電，我會照擺喺度當普通牙刷用，而佢就一定會幫我叉電，喺生活細節上好細心。」
被稱「最強後母」的她，最初是因為教兩個繼女舒婷和舒雅手工藝，而認識楊志翹。難得她視兩繼女如己出，即使之後再生一女舒然，也對三個女一視同仁。「小朋友好敏感，刻意去奉承又死，唔接近佢又死，最好的相處方法就係順其自然，大家一齊成長。」
「楊太」這稱呼，自2009年起已跟了楊卓娜16年，但原來「兩夫婦」仍未正式註冊結婚。「佢成日向我求婚，但我係好有儀式感嘅人，想去一個特別的地方，有啲特別嘅求婚方法……不過你問我具體係點，我又講唔出。加上早年大家的心思都放在屋企和工作上，拖下拖下就到𠵱家。不過我同佢講今年犯太歲，係時候要沖喜，哈哈。」
有些情，不需要一紙婚書去證明。兩個人走過的一步一腳印，便是愛的最佳憑證。
毛公仔
小時候，母親曾經想送楊卓娜和楊茜堯每人一隻毛兔仔，可惜因經濟情況不許可，最後只能買一隻。身為姐姐的她，於是將毛公仔讓了給妹妹。
而她整個童年，都未曾擁有過一隻毛公仔。
「其實我並唔係想要隻兔仔，而係我好羨慕阿妹有呢個『兒時玩伴』，代表一份愛。」
長大後，她開始學縫紉，除了handmake 毛公仔，在細女出世時，她還買布親手造了一張「百家被」。
「對我嚟講，當中係包含好多愛與祝福，但呢一代嘅小朋友物質豐富，都唔在意呢啲嘢。人生就係咁，太豐足的時候，唔識珍惜；反而擁有嘅嘢愈少，愈覺得珍貴」
有些愛，不用宣之於口，眠乾睡濕的感動更是無價。
延伸閱讀：袁偉豪 陳自瑤 姜大偉 楊卓娜 馬國明 高海寧群星拱照賀蛇年 同你賀新年 !
延伸閱讀：台慶頒獎禮2024｜47歲楊卓娜薑越老越辣 胸戰激烈 馮盈盈輸晒 !
《東周網》訪談系列節目《星桄伴我心》3月重磅嘉賓：
即睇：65歲林漪娸親揭與某藝人不和內幕 笑談老公鐵漢柔情 分享美魔女秘訣
即睇：倪樂琳曾因心口胎記感自卑 爆媽媽鍾意某男星
