發佈時間：17:05 2025-03-21
有珠寶界「中東王子」之稱的沈運龍，早前宴請數十位中東經貿協會好友，到其位於何文田的家中開除夕倒數派對，事後他在網上分享照片，令他這間坐擁維港270度無敵煙花景觀、面積4,000多呎的三層複式連天枱空中別墅再度成為焦點。
這天到訪沈運龍的家，他透露：「這間屋在06年趁樓市低水時，以3,800萬元的筍價買入。我住屋鍾意地下連花園，或者頂樓連天台，有段時間住獨立屋，點知又被賊人入屋爆竊。這間屋就最好了，連天台足足有四層，有apartment的保安，亦有獨立屋的格局，是一間位處47樓的空中別墅，最正是無論在廳或房望出去都無遮無擋，換衫都不用拉窗簾呀！」
露台可鳥瞰何文田山
這天相約沈運龍訪問，他提議於黃昏5點開始，「因為呢個時間嘅景觀最靚，可以睇到日落彩霞，和入黑之後山下和對面海萬家燈火的夜色，每隔幾分鐘都唔同，真係好靚，到農曆新年仲可以無遮無擋睇煙花。」
踏入其居所，是一個巨型的長方形客、飯廳，連開放式廚房和酒吧，直出露台可鳥瞰整個何文田山，和遠眺維港和對岸港島景色。他笑稱屋企猶如一幢空中別墅，「因為呢度喺47-50樓，同我以前住過嘅獨立屋一樣有四層。最低一層係客、飯廳，我將廚房改成開放式，原本近露台位置有間房，我裝修時改建成小酒吧，令到整個廳空間感大增，開派對容納7-80人都好鬆動。樓上一層是主人套房和書房，再上一層是子女房間和客房，頂層則是天台，開派對時仲可以BBQ。」
近年學打鼓的他，在客廳大電視前更放置了一套流行鼓，「疫情期間見悶搵嘢學，學咗3年，都換咗幾套鼓，最新呢套係木製，聲好靚，只係萬零蚊。我冇興趣學樂理，貪打鼓唔使睇譜，數吓拍子就打到，有時聚會時玩吓，幾好氣氛。」
沈運龍偏愛複式格局
沈運龍笑言一向鍾情特色單位，尤其偏愛複式格局，「我喺周邊仲有投資其他物業，但都係複式連天台，有個喺亞皆老街，更是由兩個單位打通，變成四單邊、四露台，有時裝修完覺得靚，自己又想住吓。我一向對住屋都有要求，景觀要夠開揚，最好有地方俾我搞吓綠化同種吓嘢，太太鍾意烹飪，所以會種一啲煮餸用嘅香料，如香茅和薄荷葉等。」
他當年買入這個單位，希望太太和子女有個安樂窩，但隨着近年兒子和女兒先後到美國升學後，家中就只剩下他和太太居住，「始終呢間屋面積太大，兩個人住，即使加埋工人姐姐同隻狗，都有啲浪費，所以早幾年曾打算放售，於是我同太太曾搬去鄰近，面積細少少的另一個物業居住，但疫情後樓巿向下，見售價去唔到心目中的價位，加上住住吓出面，都係鍾意呢間屋多啲，年前重新裝修後就搬返嚟住。」
室內設計簡約 愛藝術擺設
居所室內設計簡約，他稱喜歡家居簡潔舒適，當中不少掛畫更出自其女兒手筆，「阿女好有畫畫天份，她15歲嗰年，去大嶼山大澳見到隻猫，影張相，返嚟就畫咗一幅畫。年前喺一個晚宴上拍賣，以$8萬元成交。畫就賣咗，屋企呢幅只係copy，而我書房有一組油畫，都係阿女畫嚟送俾我。」
家中不同角落亦有不少特色擺設，部分是他早年在中東和歐洲做生意時購入，也有部分由朋友送贈，充滿藝術感，「酒吧枱下的水晶櫃，是我早年和水晶品牌施華洛世奇合作時送我的禮物。因為我唔想間屋太花巧，只係擺咗少少從外地買回來的特色擺設，如阿拉拍的水煙壺、土耳其的馬賽克燈、駱駝香薰座和大象酒架等，還有部分是朋友送贈的出土古玩，和自家公司製作的工藝品。」
問他有沒有擺風水陣，他笑說：「風水我就冇考究，亦冇搵人睇過，住喺度一直心安理得又自然舒服，不過有識風水嘅朋友上嚟玩時望過吓，就話我擺嘅嘢同方位都啱晒數，哈哈！」
《東周網》訪談系列節目《星桄伴我心》3月重磅嘉賓：
即睇：喬寶寶細仔不良於行 陪伴中風病母 感觸落淚：見得幾耐得幾耐
即睇：65歲林漪娸親揭與某藝人不和內幕 笑談老公鐵漢柔情 分享美魔女秘訣
