發佈時間：08:46 2025-02-20
喜事，並非新春期間限定。抱着不停步的心，邁步向前；或是微小如生活中的小確幸，都能增添喜氣。
周秀娜跟胡子彤，驟眼看大概只是認為二人同為演藝人，最近他們的交匯點，是賀歲片《臨時決鬥》，電影於上周票房衝破1,000萬大關，在本地影壇的低潮期，實屬喜事。
一身紅彤彤的周秀娜，笑言要喜上加喜，入行16年的她，演技不需置疑，但她並未因而停下腳步。
「啱啱過咗嘅一年，我覺得都幾滿足嘅，因為拍咗兩部電影，兩部都令我學識咗新嘅嘢，一部就係保齡球（未上映電影《大分瓶》）一部就係《臨時決鬥》嘅泰拳。所以我都希望今年都仲係可以有一個咁好嘅活力，甚至乎有唔同嘅挑戰可以俾自己去再去嘗試。
「而今次呢個班底、合作嘅演員，基本上有好多都係我第一次合作嘅，雖然係咁，但我覺得係好有火花同埋好新鮮，希望嚟緊都可以繼續同唔同嘅演員、導演合作，演員嘅修養好重要，同埋我都想要獎座⋯⋯我對獎項係有期待嘅！」
對入行11年的胡子彤來說，獎項可能較為遙遠，但他的目光，就比大眾所想的，更為遠大。
「龍年對我嚟講，當然係一個好特別嘅一年啦！首先《九龍城寨》真係俾多咗好多觀眾去認識我；另外一個特別嘅moment，就係我出咗自己嘅歌啦！即係多咗一個歌手嘅身份，所以係好值得紀念嘅一年。
「我覺得係一個好好嘅突破，特別係喺歌手呢一個身份上面，其實我一路都真係鍾意唱歌，但係去做歌手嘅決定，一路都諗咗好幾年，喺上年就真係『的』起心肝決定要做，亦都真係做到，所以今年都希望繼續做，除咗電影，我都會喺音樂度，花多少少時間，去俾大家知道我係原來都係真係鍾意唱歌。」
踏出多棲發展的一步，足以令胡子彤感到幸福。
「我認為歌手嘅胡子彤，係會擺多啲自己嘅情感落去歌入面，可能未必係大眾所認識嘅我。所以上一首歌，就係以感激為主。
「嚟緊呢一年嘅計劃，可能都真係胡子彤對感情嘅內心世界係點樣出發，或者係一個點樣嘅畫面，可能係會以呢一個方向去做，我自己都幾期待俾呢一面大家見到。」
人生每天也是現在進行式，像他們懷着喜悅走每一步，好事自然就在門前。
開拍前做足準備
雖說是賀歲片，但有別於純粹為觀眾帶來歡笑，《臨時決鬥》與泰拳有關，所以周秀娜與胡子彤，在開拍前已有一堆準備工夫要完成。
飾演女拳王的周秀娜，除了拳脚上要增加說服力，氣場也要下苦功。
「我平時做運動，都有練過Kickboxing，因為我之前有拍過一套戲，其實都係有關於一啲動作，但唔係正式接觸泰拳，所以都有啲唔同。而我個角色係一個女拳王，所以變咗我覺得要喺感覺、姿勢上面，尤其是要有去睇泰拳比賽嗰個感覺。
「頭一兩日練嘅時候，佢哋（指導）成日都話我個樣太善良，因為我仲記緊、仲諗緊啲動作，佢哋就話，我要兇啲，不停都係叫我個樣要兇狠啲，所以開頭嘅時候，練咗幾堂，其實都幾氣餒，成日都覺得練咗幾個鐘、爆晒汗之後，都係覺得我唔夠兇狠⋯⋯」
胡子彤在旁「落藥」稱：「你真係似係一出嚟就係『我好勁呀！我係高手呀！』嗰個Feel！」
周秀娜聞言一笑，再說：「我同子彤今次係師姐同師弟，其實之前我哋都有喺大馬拍過戲，雖然就冇乜對手戲，但同佢都熟絡咗，今次算係多對手戲嘅一次。」
現場所見，二人不時你一言我一語，互動感十足。戲中的胡子彤也是泰拳手，即使拳脚無眼，可幸的是他這次並未如拍攝《九龍城寨之圍城》時那樣受傷。
「今次冇事！托賴有拜神開工！因為今次其中有一個環節，就係我真係要同一個拳手對打，所以最辛苦可能就係要戒口。
「拍嗰場戲之前，我得一個禮拜至10日嘅時間準備，訓練人員同我講，嗰10日我就淨係可以食雞、食菜同埋食少少飯，咁我覺得對於咁為食嘅我嚟講，戒口係一件非常之難嘅事。」
相關內容 : 古天樂《臨時決鬥》嚴厲怒撻王丹妮 周秀娜打到受傷
周秀娜開工首日即掛彩
而每次也100%投入演出的周秀娜，就成了掛彩的「幸運兒」。
「開工第一日就傷咗呢度（一指小腿骨位置），縫咗5針。我整傷嗰陣時，冇諗住傷口會爆開嘅，我以為只係好痛，我係俾隻鐵櫈腳𠝹到，但導演未嗌Cut，就要頂住㗎啦！我就以為純粹係瘀咗啫，但係我搓吓搓吓，就甩咗塊皮。
「現場有急救嘅，就幫我處理咗。後來拍完嗰日嘅戲，我先去醫院，醫生就話傷口其實係爆開咗，洗咗傷口之後，佢就話係要縫針，咁就縫咗5針。而縫針嘅時候，我趁醫生整之前就擘開咗個傷口，係因為純粹好奇，想睇吓有幾深，原來都有1cm深，但醫生打咗麻醉針嘅，所以當時唔痛。」
訪問當日，周秀娜的傷口上仍貼着膠布，她坦言不介意留有疤痕，「真係有需要嘅話，都可以去疤嘅。」
除了開工，於周秀娜的IG上，不難看到她周遊列國的行蹤，而說到剛過去的農曆新年，她也把話題帶到賀歲片。
「我屋企新年係長期睇一個電影台，都係不停咁樣重複㗎嘛，即係我細個嘅時候，最深刻印象就一定係《嚦咕嚦咕新年財》，即係Gigi（梁詠琪）嗰套啦！
「而𠵱家為咗志在大家可以一齊聚吓、開心吓，新年嘅時候，我都會打吓牌，發吓新年財嘅。」
周秀娜今年3字頭4字頭
農曆新年是傳統大節，胡子彤表示，近年稍稍沒跟隨胡家的過年習俗。
「隨住人長大，好似冇再去追隨傳統咁，好似嗰陣時話初一起身唔洗頭、唔沖涼，可能細個有遵守嘅，唔知點解，反而大個咗之後就冇特別，咁都要出街見人嘅，拜年當然係沖個涼、擸個頭啦！
「初一就一定會同屋企人食飯，第一口要食齋，跟住之後就正常食。我屋企又冇好嚴謹去做一樣嘢，反而係覺得，屋企人喺過農曆年一齊聚番，一齊度過嗰個開心嘅時間，我就覺得緊要啲。」
周秀娜點頭贊同，惟其情況跟胡子彤有點不同。
「𠵱家大個咗，因為唔係同屋企人住，所以可能呢啲嘢唔係跟得咁足，但一定會食團年飯啦。同埋第二日起身會拜神，同埋會食齋。我記得有一日係要食齋，同埋一定要着新衫，我細細個時，一定要着新衫。」
說起衣裝，外形甚潮的胡子彤，到今年還是有些過年習慣，未有改變。
「我係會買長褲，過年前一定買長褲（周：『因為呢套戲唔可以穿長褲？』）唔係呀，因為我每年都一定會買新嘅底衫褲，同埋長褲，因為長褲代表『長期富有』，『長富』！所以點樣都會買一條，同埋新嘅孖煙囪。」
時間不等人，今年將由3字頭轉成4字頭的周秀娜，對數字敏感度極高，聞言即反問：「轉咩字頭？」
反應快的胡子彤表示：「唔好問！唔好問！」
而周秀娜就說：「我唔記得咗啦已經，哈哈！」
胡子彤視當歌手為夢想
眼見未為真，而真相，往往予人驚喜。
去年踏出當歌手的第一步，被胡子彤視為夢想成真，而其身旁的周秀娜，則感到「驚為天人」。
「佢出歌之前，我直頭聽過佢唱live呀！因為我嗰次有去聽阿峯（林峯）嘅演唱會，其實我哋當時啱啱喺馬來西亞一齊合作完一套劇，佢喺我心目中一路都係一個⋯⋯（胡：『一個傻仔囉。』）唔係！係演員！同埋一個運動員，好陽光嘅一個男仔啦！
「咁我就無諗過佢會做嘉賓喎，因為我又睇咗《九龍城寨》，以為佢哋都係喺台上面傾吓偈，而且我冇聽過佢哋唱歌，到我真係喺現場聽歌，嘩！我真係心心眼！即係完咗個Show之後，我同佢講佢唱得咁好，點解以前唔唱俾我聽？」
被大讚的胡子彤，臉上即時有少許泛紅，並預告下一步大計。
「我會再出歌㗎，其實好想喺今年年頭出嘅，咁你都知道，人生豈可盡如人意呢？但係我會盡快錄好首新歌，希望可以有個完美嘅Timing，有首新歌送俾大家。我都好期待㗎，因為我真係啱啱先收到份歌詞，我自己都相當鍾意！」
周秀娜對後輩報以微笑，予以支持，看來她對這個驚喜，非常滿意。
