發佈時間：14:30 2026-07-22
我入大學揀科時只憑興趣和成績，選擇主修化學和植物學；以前都分享過，中學時我好迷化學實驗，而生物科成績又唔錯，所以順理成章揀呢兩科。當時入到港大已經好雀躍，完全冇諗過畢業後出路。到大二、三時先開始認真諗，理科生出路一係教書，一係打政府工，兩者都並非我最理想嘅職業，幸好最後見到滙豐招聘並幸運獲取錄，從此踏入金融職場。
事實上，當年大學係傳統象牙塔，教授做研究出學術文獻，甚少同商界合作或自行將科研成果商業化。今日港大植物學已經併入生物科學，甚至好多同學揀讀生物化學、生物醫學等跨學科，學習範疇更廣。出路方面，隨住「產學研」一路發展，大學科研同創科界逐漸形成生態圈，畢業生可以選擇嘅工作多咗好多。
因此我好贊成北都大學城以產學研為主導，而且區內有創科用地和研究醫院等配套，更利於壯大創科生態圈。上次講咗建立大學城嘅經濟誘因，今期續講大學城可以用乜嘢模式發展。呢個問題可以從教育樞紐、產學研結合，以及資源共享呢三個目標切入。先睇下外國大學城嘅發展模式，香港能否借鏡。
建構教育樞紐方面，今年四月政務司司長陳國基率團到訪嘅仁川大學城值得參考。仁川大學城為海外學府提供「延伸校園」(Extended Campus)，例如喬治梅森大學（George Mason University）、美國紐約州立大學（State University of New York）、猶他大學（University of Utah）同比利時根特大學（Ghent University）都在此設獨立校區，令學生可以喺本土享有世界一流大學嘅學位同教育資源，部分更提供機會畀學生出國到主校入讀一年。
推動產學研結合方面，可以參考瑞士巴塞爾大學（University of Basel）Biozentrum研究中心同科技產業嘅合作經驗。中心積極同科企合作，現時兩間國際藥廠諾華（Novartis）與羅氏（Roche）都同中心研究團隊緊密合作，而且中心同兩間藥廠園區和研究設施相鄰，方便合作交流。未來，牛潭尾大學城附近建有新田科技城，相信亦能夠發揮協同效應。
北都大學城亦可以更有效落實資源共享。現時本地大學都有一定程度嘅共享措施，如八大院校學生憑大學圖書館長聯席會（JULAC）圖書證，可以互用各個院校圖書館，未來大學城可以更進一步建立共享圖書館。另外亦可以借鑑美國克萊蒙特諸校（Claremont Colleges）嘅課堂政策，唔同院校學生可以喺五間學校之間任意選擇自己想讀嘅課堂。除咗擴大資源效益，仲可以促進各院校學生交流。
研究資源亦可以共享，例如有外地大學城實驗室採取共享方式，大學有適合研究項目先按需要租用，能夠節省重複購置設備儀器、興建實驗室嘅成本。另可考慮將商界和社會資源接入產學研生態圈，如鼓勵更多私人企業人才到大學執教，以及大學教授到私人企業做研究工作等。
立即追蹤《東周刊》全新WhatsApp頻道，緊貼全城熱話、突發猛料、獨家消息！
https://bit.ly/4gnvlZf
