發佈時間：14:30 2026-07-15
政府積極推動「北都大學城」建設，其中洪水橋片區將喺兩個月內招標。趁住暑假學生考慮升學問題，我分兩期傾下香港喺發展教育產業方面有乜嘢優勢，而大學城對經濟又有幾大貢獻。
發展大學城，先睇香港專上教育質素。國際高等教育調查機構QS六月中公布最新世界大學排名，香港繼續有五間大學位列全球百大，四間入五十強。香港大學連續兩年穩佔十一位；中文大學首度躋身全球二十強，排十八位；科技大學躍升至三十三位；理工大學亦首次躋身全球五十強；城市大學排五十二位。浸大、教大、嶺大等亦打入名單，齊創下佳績。呢份成績更亮眼嘅地方在於，排名反映本地大學學術同研究水平，因此北都大學城亦善用學府研究資源推動「產學研」。
QS另一項排名係根據當地大學名次、學生多元化、地方吸引程度、就業市場活躍度、生活開支水平、學生評價等，列出最佳學生城市（Best Student Cities）。今年排名首三位係首爾、東京和倫敦；而香港以八十八分排十七位，其中失分最多係生活開支水平（三十八分），相信單計住宿，香港已經頗難負擔，希望日後北都大學城配套足夠宿舍，減輕學生開支。
建立大學城有乜嘢實質好處？由密歇根州立大學主導嘅美國社區計劃（American Communities Project），其中一個研究課題係大學城嘅經濟影響。計劃認為，雖然美國人對大學學位重視程度逐漸減退，特朗普政府又削減大學和研究撥款，但大學城除咗係教育樞紐，亦往往成為當地經濟引擎。擁有大學或高等學府嘅城市中心或小鎮，平均錄得較高人均GDP；根據二○二五年數據，擁有一線（Tier-1）研究型大學嘅郡，平均人均GDP逾五萬九千元（美元，下同），比周邊郡高逾三成七；非一線大學城所屬郡人均GDP則逾五萬一千元，比周邊高近一成七。擁有一線研究型大學嘅大城市人均GDP逾十一萬三千元，同非一線大學城市比較相差二萬九千元。
北都大學城將會有三個城區，各自有唔同定位：洪水橋係應用型高等教育同國際化人才培養中心；牛潭尾鄰近新田科技城和河套，將主力發展生命健康科技等先進產業；新界北就屬於綜合藝術暨產業校區。大學城嘅核心理念，除支持香港成為國際專上教育樞紐外，亦包括推動產學研融合。
產學研嘅重要性，可以從美國北卡羅來納州知名科技重鎮得到印證。人工智能AI興起，令美國喺矽谷呢類傳統一線大學城區以外，帶動「研究三角區」（Research Triangle）蓬勃發展，其中最著名嘅係北卡三角；呢個研究園憑藉三間知名研究型大學，吸引IBM、思科、GlaxoSmithKline、Dell、Lenovo等科企進駐。園區今年報告指區內近四百間企業、五萬五千僱員，每年經濟影響達二百五十億元。今期講咗why，下期繼續講how。
立即追蹤《東周刊》全新WhatsApp頻道，緊貼全城熱話、突發猛料、獨家消息！
https://bit.ly/4gnvlZf
