發佈時間：18:56 2024-01-12
冬天天氣乾燥，唔好話護膚要超強補濕，皮膚先唔會乾到爆；想化個望落濕潤無紋、滑溜有光澤的冬妝都唔係咁易。今次「星級化妝師」Gary Chung就傳授7招冬天上妝都可以又貼又服的心得，大家可以參考參考！
第1招：
「好多人搽完粉底後睇上去又乾仲起晒紋，原因係冬天缺水嘅死皮變得更粗糙，所以化妝前要先去死皮。冬天用普通磨砂膏會太強，所以要選用較温和嘅潔面粉去死皮，啲粉就會貼好多。」並推介gülsha晨露純玫瑰潔面粉，「因為gulsha用最貴嘅大馬士革玫瑰，同埋冇混其它油，係真材實料。而用玫瑰味除咗滋潤，仲可以均勻膚色同抗菌，加上天然香味好紓緩。」
第2招：
「保濕方面，唔洗成Set Skincare換晒，只要將用開嘅Cream加兩滴玫瑰精華油，光澤感即時增加，個底妝仲成日都唔會起紋。」
第3招：
「好多人以為搽厚啲粉底就可以遮皺紋同乾紋。錯晒！其實粉底越厚，啲粉就更容易攝入坑紋、令紋理更明顯。秘密係用帶光澤透亮嘅CC Cream，好似反光板咁令皮膚睇上去更平滑無暇。而CC cream用手搽都可以。」
第4招：
「要遮蓋黑眼圈同雀斑，唔可以用傳統遮瑕膏，因為通常較厚，要用粉底膏代替，用搽粉底專用嘅海棉或粉撲輕印黑眼圈同雀斑就最貼服，包你滑過剝殼雞蛋！」
第5招：
「想皮膚有韓式水潤感，千祈唔好用乾胭脂，因為一掃塊面就出晒乾紋，用胭脂膏就No Problem喇，胭脂膏可以喺微笑時蘋果肌凸起嗰陣，用手指抹上。」並推介CANMAKE夢幻胭脂膏（珍珠系列）。
第6招：
「上完粉底同胭脂膏，最後先上小小定妝粉，可以係乾粉或碎粉，個底妝就可以滑嘟嘟啦！推介CANMAKE絲滑潤澤蜜粉，呢隻超輕透。」
第7招：
「最後，面上仲有一個位好易乾，就係個嘴，今年興番用唇彩，可以試下Dior Addict Lip Glow Oil，因為Dior Oil好潤，有小小色唔會有濃妝感，睇上去個嘴唇濕潤好有少女感。而用唇彩前可以先用潤唇膏軟化唇部死皮，敷幾分鐘後抹去死皮再化唇彩效果最靚。」
