陳奕迅的EAS MUSIC宣布簽下女Rapper KALAI家麗之後，網上出現不少評論。
有人讚KALAI正，有人覺得OK啦，亦有人開始發帖：「其實香港仲有好多獨立音樂人值得大家聽見。」
下面很熱鬧，一堆名字、一堆歌、一堆link。
我一路碌，一路覺得幾好。有些名字我真的從來未聽過，自己都增長了見識。最開心係，原來香港仲有咁多人真心聽音樂，願意為一個自己有聽、但未被大眾認識嘅音樂人，寫幾句介紹，希望多一個人撳入去聽。
KALAI被看見之後，反而帶出更多名字，呢件事幾有意思。
一束光落在一個人身上，未必只照亮佢，附近的人，都可能因此被望見。
香港從來唔缺有才華嘅人，缺嘅往往只係一個機會。
KALAI以前都係其中一個。
之前跟Eason巡演，我只知道呢位小朋友係團隊一員，幫忙周邊產品工作。有時大家一齊食飯，傾偈唔多。後來知道Eason簽咗佢，我第一句甚至係：「吓？原來佢唱歌㗎？」
直到9月14日發布會，我真正企喺台下睇佢表演。
燈一着、音樂一響，完全係另一個人。佢唔驚、唔縮，唱、跳、Rap，用盡全力享受舞台。
嗰刻我開始明白，點解Eason會想幫佢。
但我更加欣賞嘅，係Eason願意真真正正付出。
籌劃KALAI呢個項目時，我曾經提出：「不如問下Eason，肯唔肯企出嚟撐佢一次？唔好只係發段稿簽咗個人，不如認真做一個大型發布會。」
一個發布會，場地、製作、舞台、燈光、人手，樣樣都係錢；之前支持KALAI錄歌、做音樂、製作作品，本身已經投入不少。
沒料到Eason一口答應。
去到今日呢個位置，名氣、成績、舞台，有能力並唔稀奇，難得係有能力之後，仲願意將時間、金錢、心力，分一部分畀另一個人。
Eason有首歌叫《相信你的人》，我一直很喜歡。
KALAI聲帶出問題、要做手術，甚至唔知道自己之後仲唱成點，Eason冇催，只叫佢先醫好把聲，其他事情慢慢再講。
呢個世界，大部分人都係等你有成績、有人氣之後，先開始相信你。
真正難得嘅，係你仲未被很多人看見時，已經有人願意先押上一份相信。
所以網上嗰堆link，唔好食完花生就算。
撳入去聽。覺得好，留一句：「好聽，支持。」
對你可能只係四個字，對一個唔知道幾時先會被聽見的人，可能已經足夠令佢再行多一段路。
多謝陳奕迅先生。
自己站在光裏這麼多年，仍然記得替別人開燈。
更難得的是，這盞燈不只照亮一個人，也讓更多人開始看見，原來旁邊一直都有很多值得被聽見的名字。
