與其送別人一袋米，不如教他如何種植稻米。與其送別人一條魚，不如索性教他如何捕魚。無止境的援助，可能濟燃眉之急，不過長遠來說，還是希望對方能靠自身的努力去脫貧，自給自足，不用攤大手板只顧索錢。
藝人張致恒為了養活妻子雯雯和四名兒子，長年拖欠租金和水電煤費用，僅靠當運輸工人的微博收入，去孭起一家重擔。
入不敷支，每個月都鋪鋪清，欠單如水蛇春咁長，可以想像，張致恒的境況，已經寸步難行，徬徨無助。直到他遇上了七仙羽師傅，就像浮沉苦海上攬住一塊浮木，於是他不斷問七仙羽借錢，舊債未清，新債又借，欠七仙羽的債就快厚過電話簿。
「師傅，我屋企水費明天到期，你可以借我$300嗎？過咗明天可能會被cut水錶⋯⋯雯雯個婆婆喺珠海過世，我要上去奔喪，你可以借$700俾我做交通費嗎？一個人來回交通要百幾蚊，但我唔夠錢搭車，希望師傅做吓好心幫少少……師傅，我仲爭$5000交租，已經過咗期幾日，我真係冇辦法，走投無路，怕全家人會被趕走⋯⋯」
連月來，七仙羽不斷收到張致恒和太太雯雯的借錢訊息，她於心不忍，覺得大人唔食，細路都要食，於是每次都仗義出手，幫得就幫。
張致恒向她表示，家中的小朋友有特殊情況，需要食貴價奶粉，她就向相熟藥房安排，讓張致恒每個月都可以到藥房拿取奶粉和日用品，賬單由她支付。
「佢話做搬運的收入，係靠小費，但唔多，佢要交租、養小朋友同交雜費，又冇積蓄，長期都唔夠錢用。」七仙羽上星期出席活動時向記者透露，借給張致恒應急的錢，已有六位數。
不少朋友勸她長貧難顧，但她有見張致恒真的有工作，肯靠勞力搬運去賺錢，而且捱到五癆七傷，於是繼續以慈悲心對待。
本週一上午，張致恒忙於搬貨工作時，他的太太雯雯致電七仙羽：「師傅，我都掙扎咗好耐，但最後都決定再求師傅，因為聽日就要畀電力公司cut電，所以想你再幫忙一次，幫我哋交今期電費⋯」
我知道，這一次，七仙羽又會如往常一樣，向張致恒伸出援手。但41歲的他，如何才能走出困境？除了加油，還是不夠的。除了問七仙羽借錢，還是解決不了欠債。這條一百萬元的問題，他幾時才會想出答案？
