見微便會知著，遇大事就會見真章。在颱風逼近的日子，一個老闆如何看待員工，便能看得出是否真正關心員工安危，抑或只當是搖錢樹或者奴僕，話之你死，總之唔理塌樹定封路，點死都要死返公司當值。
上星期初，天文台已經超前部署，公布由於颱風樺加沙迫近，將可能於星期二（9月23日）下午懸掛八號風球。
對打工仔來說，意味着星期二上午仍然需要上班，到了下午兩時多真正掛八號風球之後，才可以下班，匆忙逼車回家。
明知道下午個風會打到嚟，打工仔依然冒着風雨上班，到底係因為愛？還是責任？定係鬼叫你窮，唯有頂硬上？
據TVB《東張西望》報道，有個別良心僱主，在風球還未高掛時，已率先向員工們發出通知，提前宣佈全體員工在星期二（23日）和星期三（24日）兩天都不用上班，更窩心地叮囑員工要注意安全和做好防風措施。
本刊明查暗訪，在美容店討論區上，發現有自稱是美容集團Angel Face的員工，發帖文表示：「八號風球前一晚，老闆已叫全線員工不用返工，所有分店將會暫停營業以策安全。」不少網民紛紛留言讚揚，指Angel Face的老闆唐安麒是為員工着想的「絕世好老闆」！
唐安麒接受《東周刊》查詢時，大方承認讓全線員工放了兩天打風假。
「的確喺星期一當日，天文台話翌日可能會掛八號風球時，我覺得呢個『可能』字眼係好曖昧，唔通要啲同事返嚟一陣又收工咩？所以星期一當日，我直接同所有同事講，無論第二日係咪掛八號，都直接在家工作吧！」
她續說：「到天文台後來宣佈翌日下午兩點幾會掛八號時，我即時決定全體同事喺星期二同星期三都唔使返工，因為分店係早上11點開門，我唔想啲同事返兩三個鐘，之後要撲返屋企逼車咁辛苦。」
對於網民表揚她是絕世好老闆，唐安麒謙稱不敢當，「我只會認係好老闆，我創辦Angel Face接近40年以來，我同員工嘅關係非常好，好多同事係跟咗我30年甚至40年，一直並肩而行。」她分享從商多年的領悟：「作為老闆，一定要對員工有愛心，將心比心。」
一個颶風，令人見證到良心企業的典範，誰待你真的好？誰只當你賤如草？打工仔一定會感受得到。
