二十六夜，熱力在四射，多麼想找一顆心可共野⋯⋯
是誰令到一班阿婆阿嬸阿姐，枱面放了燒雞都唔願食嘢，情緒高漲到像隊了一打生啤，釋放了潛藏幾十年的狂野？
在酒樓的聯歡飯局夜，飲咩？食咩？不外乎都是這些那些，畀得幾嚿水仲想要啲乜嘢？你唔係當自己係大爺？
不過主辦大會都幾搞嘢，請來一個樂壇茄喱啡，連個姓氏你都未必識寫，不過他唇紅齒白眼神帶邪，聲底雄渾唱得不錯呢！不時穿梭枱與枱之間舉V字嗌yeah，令氣氛如瀑布傾瀉。
這個叫禤振華的40歲歌者，正職銷售首飾搵餐晏仔啫，但他對歌星夢始終不捨，於是坐上《中年好聲音3》的尾班車，能殺入一百強已經算好嘢，但最終只得一盞燈被淘汰掃扯，唯有點頭對評判講多謝。
上過《中年3》總有名氣可借，他不時接酒樓騷冧師奶fans，以歌聲燃亮了夜，密食當三番掂過碌蔗。
這一個夜，他身穿黑西裝男人味四射，唱《狂野之城》扭到身都斜。當他走落台把距離拉近一些，握手合照任君拉扯，只見一個年近80的阿婆對他含情地啤，懷春眼神似乎有啲嘢。
可能眼前的男人不再是有陣老人除的爺爺，婆婆久鎖的芳心彷彿有特赦，乾涸的森林猶如得到甘露濺射，春心禁不住暗叫「吔媽嗲」。
請靠近多一些！再攬實多一些！當禢振華搭住婆婆高唱「如果心底的我是狂野」，婆婆趁機連錫三啖面帶嬌嗲，竟反要求對方回贈一吻相當心邪。
見對方避忌將面擰歪，心想「唓！有寶咩！」婆婆已像在弦的箭急待發射，於是掏出五百元當作打賞或「施捨」，對方即識做地錫啖婆婆呢！
搵食艱難像飲齋啡，甘苦自知如何取捨，還看心態能否看開一些？五嚿水錫幾啖啫！就當是慈善敬老夜，讓婆婆登上甜如蔗的初戀時光車，思憶回到含苞那一夜，那個他曾狂熱地跟她錫到嘴都歪！
最Hit
