成長於橫頭磡邨的吳業坤，典型屋邨仔，常流連籃球場打波，生活簡單，卻快樂。
「細個我玩到差唔多天黑，就會返屋企食飯，有時仲會帶埋朋友仔返屋企打吓機。」
童年家境並不富裕，他常常諗計仔去慳零用錢，「食嘢最緊要夠平同夠飽肚，咁最平就係菠蘿包同雞尾包，我有$20，買完個包剩返$16，就可以儲到$16囉！」
入行後，每當心情很疲倦或感到迷惘時，他最愛回到舊居的屋邨沉澱，「有時返到去熟悉嘅地方走一轉，會得到新嘅感受。」
就像最近他一個人食米線的時候，教他想起十多年前參加《超級巨星》歌唱比賽，那年頭他跟某個參賽者一起食米線，見到對方飲完跟餐的凍檸茶後，再另外俾$18，散叫多一杯凍檸茶。
當時吳業坤相當震驚，自認「貧窮限制了想像」，怎麼會有人如此豪氣，肯俾錢飲多一杯凍飲呢？他即使現已脫貧兼成家立室，也自言不捨得散叫凍檸茶。
屋邨仔的生活日常，你想像得到嗎？你體驗過嗎？你懂得箇中感受嗎？以下盤點，可有你的影子？
一枝唧到盡的牙膏，不肯扔掉，會費盡九牛二虎之力，誓要唧多幾次吧！
即使浴室的洗頭水已經用晒，都會沖水入去，搖勻後再用多十次八次。
一碟食剩三分之一的餸，會留起當隔夜餸，翌日翻蒸或變做炒飯，食得唔好嘥。
難得外出吃飯，一定會順手牽羊，拎返幾支免費牙籤慢慢用。
那年代還未流行智能電話，睇完的舊報紙，會撕下來當枱布鋪枱開飯。
沖涼不會用甚麼柚子味或香薰味的沐浴露， 一塊平價番梘，已可用上半年，慳好多。
住屋邨未必有暖風機，冬天會去室內體育館免費沖熱水涼，可以慳唔少水費同電費，沖到皺皮都不會有人干涉。
幾蚊買一個大麥包，一半當早餐，一半做午餐，然後狂灌幾杯水，填飽個胃。嫌味道太淡的話，會去連鎖快餐店索取免費牛油。
在食肆叫汽水時，會講一聲「唔該走冰」，咁就可以賺多幾啖可樂㗎 ！
收到來信，如果發現郵票僥倖沒有蓋上郵章，會撕下來，用水浸泡，晾乾後留待下次寄信用。
屋邨回憶總是暖暖的，祝福你今日有能力飲得起「散叫凍檸茶」，少甜少冰跨啦啦！
