浮沉在人生的滄海，誰有豪情留下一聲笑？

「我是賤命一條！」王貽興的身世，從來都是自己做擺渡人，在食屎際遇中，找到心靈救贖。

從前的身份，是才子，年僅21歲，已憑小說《無城有愛》，奪得香港中文文學雙年獎，成為該獎項創立以來，最年輕得獎者，在文壇大放異彩。

如今他搖身成王老師，做了堪輿學家，開班教紫微斗數，收幾千元替人開盤算命。「堪輿，可以係境況堪虞，我其實係坎坷學家。」

單親家庭長大，5歲前只見過爸爸3次，之後再沒在生命中出現過。原來爸爸早有正室，是東南亞華僑， 30歲時來香港做生意，在酒店西餅部，邂逅只有16歲的媽媽。不倫戀，種下愛恨交纏的情債。

「頭幾年聽聞爸爸有寄錢返來，之後就銷聲匿跡。」

童年的王貽興，就跟着媽媽和4個舅父、3個阿姨、1個外婆，一起蝸居在北角堡壘街的300呎斗室。

「夜晚就將床褥放喺地下，全家攤喺度瞓覺，好似義莊咁。」

他有一個阿姨是聾啞兼弱智；一個舅父則有精神病，成日霸住廁所，不停開閂水喉。另一個舅父，愛上夜總會舞女，爛賭欠貴利。「大耳窿經常淋紅油，凌晨又拍門撳鐘追債，屋企人日日為錢為小事嘈交，拎菜刀互兇。」

王貽興上美術堂時，畫的全家福，是全家親戚總動員，「老師笑我，同學又問我點解，我唔想講，唔希望成為更羞恥嘅笑話。」

畢竟家貧，每天要由北角徒步往柴灣上學，午餐要靠食麵包狂灌水喉水先夠飽，在校內又常被欺凌，「去完廁所，返課室會見到書包被掟落操場，書簿又撕爛晒。」

以為回到家，可以在媽媽身上得到慰藉？只是天方夜譚，媽媽長年視他為出氣袋，加以虐打。在夏天，他要穿長袖冷衫遮掩手上的藤條瘀痕。「我問過點解成日打我，媽媽話因為我個樣似老竇！」

當年考入中文大學中文系，他需要2萬多元交學費註冊，問媽媽借錢，卻換來一句：「你自己搞掂啦！（我咁多年的利是錢呢？）使晒啦！你白癡㗎 ？」最後他要去到母校教員室，向老師和班主任苦苦哀求，才借得學費讀上大學。

咁多年可曾有過快樂的感覺嗎？「應該冇！」王貽興苦笑說，他的名字是跟族譜，「貽」代表饋贈，「興」寓意高興。

「爸爸希望呢個仔能帶歡樂俾人，我成日講：『咁我咪把悲傷留給自己！』我已經習慣咗，亦都放低咗，所以不當一回事，正所謂：屎沖開了便淡。」