離開，是為了下一次回來，可是有些倉皇遠去的身影，回頭卻太難嗎？
2019年的春天，黃心穎步入生命中的冰河時期，天崩地塌，雨打風吹雷劈電擊，感覺活像墮入無間地獄，永不超生。
聽到的，是自己日夜痛哭的聲音。看到的，是找不到出口的絕路。
她選擇出走美國，報讀幾個演藝課程，把時間填得滿滿，不容許自己胡思亂想，又藉着排戲時，盡情喊出來宣洩。
「我好深信，當時係有嚴重情緒問題，但我冇去睇精神科或者心理醫生，我點樣同人解釋發生過什麼事呢？」
信佛的她，每天都向觀音菩薩上香，祈求讓她的思想不要咁負面。軟弱的時候，她當然想過自殺，安眠藥？跳樓？割脈？「我唔想Focus用乜嘢方法，最緊要係點樣打消呢個念頭。」
4年半後的今天，黃心穎勇敢地站出來接受訪問，面對自己犯彌天大錯的黑歷史。
「我最初好強烈覺得自己令家門蒙羞，我已經好傷家人個心，如果我自殺，我驚佢哋頂唔順。」她在訪問中，第一次流下眼淚。
黃心穎的中醫爸爸一向寡言，在女兒出事8個月後由美國重回香港屋企，沒有罵過她一句，反而在客廳向她做了一個加油手勢，父女情，盡在不言中。
歷刧歸來，黃心穎遇上樂手泥鯭，她一度猶豫，不停問自己：「點解仲會有人鍾意我？我根本唔係一個值得俾人愛嘅人。」
緣份令她再度抬起頭，發現天色不再是永恆的灰黑。今年10月底，她為這段婚姻寫下了沒有讀出來的誓言：「我成日講笑，你（泥鯭）係我個債主，其實我個心好清楚，你係我個貴人。如果冇咗你，我條路係好難行返出來。」
在出嫁的婚禮上，黃心穎跟爸爸貼頭共舞， 黃爸爸語重深長送上8個字：「你一定要開開心心！」
可以笑的話不會哭，當問到她在本月爸爸臨終時，在爸爸耳邊說了甚麼永別的話，黃心穎第二次流淚，哽咽說：「我叫佢唔好驚，跟住啲光去行……」
爸爸死後幾天，黃心穎的家中出現了飛蛾，「係灰藍色，對翼好靚，我知道係爸爸。」她抹去眼淚，重現笑容告訴我，在夢中，她跟爸爸重逢過一次，「我攬住佢，大家冇講嘢，夢境好Peaceful，冇悲傷。」
這個月，黃心穎做了13個訪問，「我想今年衝破好多恐懼，得到真正的reborn ！在街上面，我真係未試過有人衝埋來鬧我八婆。反而好感恩有好多唔識我嘅人，會叫我加油！」
覺今是而昨非，黃心穎撫心說：「當初一開始的道歉，可能係出於慌張。經歷咁多年之後，我真正反思自己犯嘅錯，接受咗教訓，我今日嘅道歉會係更加衷心去講。（第3次流淚）我對唔住所有受我傷害嘅人，亦多謝所有在我生命裏發生嘅事。」
邊度跌，就在邊度爬返起身，還夠膽搭的士嗎？「我夠膽坐的士，但唔多，因為我揸車。」
