
上星期中有事去中環,回程坐地鐵,在灣仔站落車,見到一個朋友,大家傾吓閒偈,佢話黃仁勳出軌單嘢,一年前已經知道,而且聘用了頂級公關拆彈專家Risa Heller幫手,現在睇嚟,似乎效果不佳,不但幫唔到手,仲搞到出軌變成間諜,整件事升上國家層面,美國甚至會動用國安法,黃仁勳今次唔死都一身潺。
老友話黃仁勳請錯人,他應該請葉觀楫(灣仔地鐵站設計的工程師負責拆彈),但唔係因為建地鐵要拆彈,所以工多藝熟,而是葉觀楫是一名講波佬,他有很多名句,其中之一是單擋,即是帶緊波球員被對方mark,他應該轉身背向對方球員,阻住他們的視線,可以從容不逼將個波交畀自己隊友,黃仁勳同樂姐食飯,知道有狗仔隊跟蹤,應該搵個老友打單擋,將樂姐好似個波交畀老友,出了事老友孭鑊,根本燒唔到老黃,如果狗仔隊跟唔到,最後冇事,就打一個one-two,將樂姐交返畀老黃,使乜請頂級公關拆彈專家Risa Heller拆解,浪費金錢。
我同老友講,現在大家講黃仁勳點解咁失策,都是事後孔明,講都嘥氣,而事實上雙黃事件發生已經超過一年,老黃絕對知道後果,如果事件牽涉間諜、國安,老黃一定會有咁實冚咁實,外人一定唔會知,老黃咁高調反而證明雙黃會只是男歡女愛,與國安無關。大家唔好以為Risa Heller冇料到,其實Risa已經做緊嘢,唔止教老黃打單擋,而是打雙擋,如果踢足球,就是教練從場外踢多一個波入嚟,令到對方球員唔知跟邊個波,最後球證叫停比賽,無傷大雅,而Risa就替老黃做多一個鬼妹樂姐,最多話老黃鹹濕,但點都唔會扯到去間諜,甚至要動用國安法。
鬼妹樂姐登場,四十八歲的輝達醫療事業副總裁鮑爾,不過,這只是一個傳聞,黃仁勳並沒有承認,但亦沒有否認,鮑爾登場,樂姐的間諜身份可信性就大降,代之而起就是老黃衰鹹濕。老實說,在美國,衰鹹濕有甚麼問題,衰十一都不是大件事,重慶人話,一件事食一餐火鍋解決不了,就食多一餐,一個鬼妹樂姐解決唔到,就整多一個,一定要其他人認同,老黃是衰鹹濕,與間諜無關,如果真係可以轉移視線,不得不佩服Risa姐的功力。
文章還未寫完,事情又有變化,傳聞中的第三個小三還未出現,黃仁勳主動辭職,立刻有人話,由此可見,樂姐的確是間諜。那人可能唔明白,間諜的意思,好似一場私人演唱會,門票不公開發售,最後有一些陌生人入嚟,經手的人可以被人話是間諜。但如果演唱會飛是公開發售,有買了飛的人倒賣,不能話那人是間諜,最多話佢係黃牛黨,輝達芯片是公開發售,就算樂姐倒賣,她只是黃牛而非間諜。