有老友在一班朋友面前問我老婆的學歷如何，是不是博士，以我的身份，應該娶一個博士做老婆，這才是門當戶對。
我話自己雖然唔係有錢佬，但唔敢娶一個博士做老婆，無謂作賤自己。我話在我的有錢朋友中，老婆連中學都未畢業有不少，但是老婆係博士就絕無僅有，碩果僅存的都要做阿二，是否好諷刺。所以，中大教授在授課時叫女同學唔好讀博士，除了浪費金錢、時間之外，女人最後都是「釣金龜」，最後竟然俾人告性別歧視。我覺得教授好冤枉，他只是夠膽將事實講出嚟，竟然俾人告。新加坡立國者李光耀在新加坡國立大學發表演說，見到那些二十七、八歲女博士生，叫他們唔好讀，反正讀完之後都要嫁人，而且，攞到博士時已經三十歲，摽梅過了很久，所以，不如放棄讀博士專心搵老公。當時李光耀收到不少掌聲，話佢幫新加坡節約教育能源，今日莊教授俾人告歧視，真係令人費解。
其實，李光耀與莊教授都冇講真正原因，事實上有博士學位的女人更難搵到適合老公，不過，這個世界看破不說破而已，冇人夠膽將事實講出嚟，令到很多女生誤會，以為攞咗博士就好容易搵到老公，自欺欺人而已。
老實說，真係有好多有博士學位的女人鍾意做有錢佬老婆，即使有錢佬一腳牛屎都無所謂，最緊要是有錢。但是她們唔知道，有錢佬寧願娶一個豬八戒都唔願意娶一個博士老婆，豬八戒的意思並不是好醜樣，而是豬八戒的性格。
在西遊記裏面，豬八戒最唔服就係孫悟空，不時死馬騮咁叫佢，向唐三藏打小報告，但在外人，尤其是其他妖精面前，非常尊重孫悟空，向對方介紹孫悟空是大師兄，大鬧天宮，三打白骨精的齊天大聖。老實說，孫悟空對豬八戒的阿諛奉承非常受落，所以平時被豬八戒鬧都唔嬲。老實說，男人就是這樣的，只要老婆在外人面前畀返兩分薄面，即使在屋企受責都心甘命抵。
有一位有博士學位的女士同我講，咁樣佢即係唔使嫁有錢佬？咁又唔係，只要稍為進化一下，將自己變成一個有博士學位的豬八戒，一定可以搵到一個適合自己的有錢佬。試想一想，有博士學位的老婆在外人面前畀足面自己，有邊個男人唔鍾意？ 如何可以做到這個動作， 男人排住隊， 點會搵唔到老公。所以，教授應該同讀緊博士的女生講，攞到博士學位之後要將自己變成豬八戒，咁樣一定可以搵到個好老公。
