中秋節前，有同學話大家聚會，講吓讀書時中秋節慘況。當日大家都是渣男，去到中秋節分身乏術，不過我冇事，都是多謝阿媽叫我大時大節一定要在屋企讀書，才可以逃過一劫。
有同學話，最近睇到一個視頻，一位女老師講古代十大渣男，李白、白居易竟然上榜。我話絕對不出奇，李白不單止是一個渣男，仲係一個怨男，鍾意老闆嘅老婆，老闆是唐玄宗李隆基，老婆是楊貴妃，又唔敢出聲，只能夠暗戀，連寫一首詩讚楊貴妃都唔敢，好彩李隆基是相當開放，下旨叫李白寫一首詩讚楊貴妃，李白話一首點夠，一口氣寫了三首《清平調》，「雲想衣裳花想容，春風拂檻露華濃。」李白雖然讚，但讚得好有分寸。
白居易當然是渣男，爛飲爛玩，而且媾女不分好醜，但求就手。我當然唔會用《長恨歌》來證明白居易是渣男，「在天願作比翼鳥，在地願為連理枝」，點可以話渣，而事實上《長恨歌》是寫得非常淒美，「馬嵬坡下泥土中，不見玉顏空死處」，死未。大家以為白居易寫得咁淒厲文章，點會係渣男？咁就錯了，大家再讀《琵琶行》，本來已經玩到散席，「忽聞水上琵琶聲，添酒迴燈重開宴」，又玩過。玩到最後，白居易同歌女講，大家交流一下，何必咁認真，「同是天涯淪落人，相逢何必曾相識。」夠渣未。
有同學話，蘇東坡妹夫秦少游是非常專一，點解被女老師話佢係渣男？同學被人呃了，秦觀並不是蘇東坡妹夫，都唔知有冇蘇小妹，甚麼「閉門推出窗前月，投石沖開水底天。」都是老作，秦觀鍾意媾女，但唔鍾意經常見面，一年一次就最好，於是寫了「金風玉露一相逢，便勝卻人間無數」。牛朗織女都是每年只見一次，成日見反而會覺得悶，「兩情若是久長時，又豈在朝朝暮暮。」渣得嚟都好有詩意。
大杜杜甫，小杜杜牧，大杜好悶，小杜好玩得，乜都識寫，《阿房宮賦》係佢寫，「天階夜色涼如水，臥看牽牛織女星。」又係佢寫，而且佢自認係媾女高手，仲係衰衰格格個隻，「十年一覺揚州夢，贏得青樓薄倖名。」用個「贏」字，渣得嚟都好有性格。
擔返張櫈，主角出場，小李飛刀，例不虛發。大李是李白，小李是李商隱，寫了很多首無題詩，點解是無題，因為要送畀唔同女仔，點可以開名，唯有遮遮掩掩用無題，李商隱鍾意玩一夜情，玩完之後女仔叫佢負責，李商隱話昨夜星辰昨夜風，女仔話大家再見面，李商隱話渴望，可惜「身無彩鳳雙飛翼」，「心有靈犀一點通」便可以，最後被女仔逼得緊，唯有借尿遁，「嗟餘聽鼓應官去，走馬蘭臺類轉蓬」，要趕住返工，唔得閒繼續玩落去，有事業心，女仔聽到都會幾開心。其實，李商隱的紅顏知己，冇一個話佢渣，這就是李商隱成功之處。
