有內地老友一家人來港，我請他們在銅鑼灣遊艇會食晚飯，老友對香港讚不絕口，並且話香港夜景應稱為香江花月夜，堪比孤篇壓全唐，張若虛的春江花月夜，講到夜景，全世界冇邊個地方靚得過香港，用萬家燈火來形容絕不為過。
任何人第一次來港，一定會驚嘆香港夜景，用萬家燈火來形容是有代價，問題出自一個家字，現在的香港人太鍾意返屋企，才會出現萬家燈火情況，但太多人返屋企，香港最後出現有夜景，但沒有夜生活，一個沒有夜生活的國際城市，怎樣講都是美中不足。
我晚上如果沒有應酬，喜歡一個人在馬場跑步，經常遇到一大批在投行工作的俊男美女，我問他們，日間工作，放工之後點解唔食飯，飲酒享受夜生活？唔係講笑，在我當打的時候，放咗工之後一路直落，食飯飲酒消夜，十二點前返屋企，老婆以為我病咗。那批俊男美女話，在投行工作的壓力太大，放工後跑步，之後各自返屋企，食一個健康晚餐，保持身材，明日又繼續搏殺，有長假期就會離開香港，放鬆幾日，香港夜生活與他們無關。
朋友的女兒在香港讀大學，這是朋友送給女兒的嫁妝之一，朋友女兒話，剛入大學時她亦不習慣，以為大學生在課餘時間一定會去飲吓酒，享受夜生活，事實完全相反，香港大學生都唔鍾意出夜街，香港學生返屋企，外來學生留在宿舍，或者去圖書館，當然會去小館食晚飯，但唔可以將小館晚飯變成夜生活。
友人問我，點解我們以前有夜生活，現在的香港人冇夜生活？其實，雖然話我們以前有夜生活，其實都是搵食，不少生意都是從夜生活傾返嚟，現在的人就算傾生意，最多是食午餐，做成生意才考慮食晚餐，如果無端端食晚飯，對生意沒有幫助，變成純粹消費，慢慢地大家都減少晚飯應酬，更加唔好講晚飯後的玩意，連生意人晚上都唔應酬，香港又點會有夜生活。
不過，要香港有返多少夜生活又唔係咁難，香港政府已經做了第一步，就是治安非常良好。其實，政府可以做多一步，為了鼓勵市民出夜街，晚上十點至翌日早上，所有隧道都唔收費，令出外消費的市民減少負擔，至於營業至深夜甚至凌晨的酒吧食肆亦要配合，大前提是價錢唔貴，又唔收小費，咁樣才可以吸引市民出外消費。否則，香港唯有繼續萬家燈火。
