在香港時間四月二日上午九點，美國總統特朗普發表對伊朗開戰的演說，有人話這是戰情咨文，內容簡直是贏麻了，事實是否好似特朗普所講，留待大家做一個判斷，但我不認為是戰情咨文，而是遲來的「討波斯檄」。
如果特朗普的演說在二月二十八日之前，內容講及伊朗發展核武，而美國有責任維持世界秩序，不得不突襲伊朗的核設施與軍事據點，突襲就變成有理有據。現在被人與二次世界大戰日本偷襲珍珠港相提並論，而當時美國總統羅斯福話未見過如此無恥之徒，想唔到竟然有美國總統做這件事。
中國人打仗比較文明，在出兵之前，一定會搵人寫一篇檄文，大家比較熟識是諸葛亮的「出師表」。其實，「出師表」是一份申請書，孔明向後主劉禪申請北伐，都可以算是檄文。
武則天自立為皇之後，有不少唐宗室貴胄起兵，當中包括徐敬業，駱賓王更加替徐敬業出兵寫了一篇「討武檄文」，相傳當時武則天頭痛，睇完「討武檄文」之後，不用藥都可以病除。
特朗普的演說話已經將伊朗炸個稀巴爛，伊朗已經無還手能力，但講完唔夠五分鐘，伊朗的導彈又打以色列，似乎唔係無還手之力，大家要留意一點，特朗普演講的時間是香港四月二日早上九點，美國無論是東西岸仍然是四月一日愚人節，所以，大家都冇認真對待特朗普的演說。
莫講話美國現在尚未擊敗伊朗，就算贏了美以伊戰爭，美國都輸掉多年來家底，美軍在中東二十七個基地被伊朗導彈炸通炸透，連自己都保護唔到，又點可以保護中東其他國家。如果特朗普沒有突襲伊朗，斬首哈梅內伊，美軍基地的脆弱防守底牌是不會被揭露出來。其實，伊朗早已知道，否則就唔會用咁多無人機來消耗美軍的攔截導彈。其實我有多少奇怪，已經有不少荷里活電影用過無人機這個橋段，點解美軍沒有考慮這個可能性。
大家聽特朗普演說時，最關心就是美軍幾時展開地面戰，奪取石油重地哈爾克島，畢竟美國有不少兵種，例如海軍陸戰隊，第82空降師，遊騎兵等，都已經集結完成，但特朗普並沒有提及奪島時間，只是講炸炸炸，如果特朗普放棄奪島，總算聽下軍事專家的說話。老實說，哈爾克島並不是石油重地，只是一個水龍頭，唔值付咁大代價，更何況奪島容易，守島一不小心，就會被伊朗甕中捉鱉，特朗普都唔想做水魚，所以，我估計奪島行動將會不了了之。
