十幾年前，我見到一個小朋友玩玩具車，他很努力將玩具車推向前，但效果很差。我知道那是一架上鏈玩具車，只要稍微用力向後拉，就會有很大衝力向前走，小朋友知道之後，玩到不亦樂乎。
我見到小朋友玩得咁開心，發覺原來退是有咁大動力，當然，坊間話退一步海闊天空，除非係Beyond，否則就很抽象。有一日我打算盤，逢三進一，三下五落二，我當時諗，既然可以逢三進一，點解唔可以逢三退一？這當然不是珠算技巧，而是投資策略，或者是物業投資者的投資策略。於是我的起心肝，寫了一本書叫《逢三退一》，銷售都唔錯，我有不俗分紅，在香港曾經出書的朋友應該知道，寫一本書真係唔容易攞到分紅，不過，寫書是興趣，分紅有就最好，冇亦冇所謂。
逢三退一的意思，就是一個持有多個物業的業主，在樓市最旺的時候，一定要強逼自己將手上最差的兩三成物業賣走，怎樣釐定最差？低層，位置不佳的要首先考慮，沒有發展潛力，長期空置的亦應該賣走。又怎樣釐定樓市最旺？就是最差的物業也可以賣走，由於是強逼性，售價可能低於市價，所以，業主在賣樓之後千祈唔好怨天怨地，賣樓所得現金等待樓市最差的時候買樓，不但可以買到靚物業，而且又唔貴。
最近，有一個外國歌手的家廚爆料，話那位歌手很浪費，每朝要佢煮三款不同類型早餐，歌手只食其中一款，其餘二個早餐就掉走，我睇到這段新聞覺得很奇怪，歌手要求的是選擇，而不是浪費，大戶人家知道，家廚每朝都會煮不同類型早餐，煲粥炒麵，火腿煎蛋，甚至日式早餐，大戶人家家人只會食其中部分早餐，其餘的就掉走，家傭是不可以享受那些早餐，否則，早餐就會為家傭而設，而不是為主人而設。
讀者可能覺得這段專欄冇乜意思？其實是有的，多年前有一個老友打算買一個自住單位，有三個都合他的心水，但是他擔心若果買了其中一個，後來發覺唔適合，但是其他兩個亦早已被人買走，他豈不是做錯選擇，錯失良機？於是問我意見，我見老友是富二代，絕對唔缺錢，於是叫老友買晒三個單位，每個單位住一陣，最後三揀一，將唔啱心水的兩個單位賣走，雖然有人話咁樣做很浪費，但以老友身家，需要的是選擇，是否浪費是不重要。最後老友聽從我的意見，將三個單位全部買下，一年之後將唔啱心水的兩個單位賣走，不單止冇蝕，而且仲賺了不少錢，在有錢人心目中，選擇是最重要，唔會考慮是否浪費。
