建滔集團主席張國榮（中）、執行董事張家成（左二）；建滔積層板主席張國華（右一）及全球市場及研發部總監張祖兒（左一）。
建滔集團（0148）和子公司建滔積層板（1888）下游產品包括覆銅面板（laminates）和印刷線路板（PCB），並一直向上游拓展，由銅箔、電子玻璃纖維紗和布等，一路去到化工產品，到今日已經打通全條垂直產業鏈。基於呢個優勢和龍頭規模，建滔一直係市場定價者，每次建滔板宣布加價，都會引發市場其他公司跟隨，繼而帶動股價上升。
加價背後有好多原因，其一係市場供不應求，但建滔集團主席張國榮（Paul）認為，提高「價格」增利要靠市場基本面好，因此最重要係透過不斷研發提升「價值」，做出科技含金量更高嘅產品，唔做通用商品（commodity），要成為行業標杆，由定價者做到標準制定者，至能夠保持優勢，支持集團力爭「上」游，以更高端產品迎接人工智能驅動嘅增長周期。建滔積層板主席張國華（Philip）對市場景氣極具信心，因為今日「算力」已經等同「國力」，預料AI新材料需求有增無減。
過去幾年，建滔着力攻克高端產品技術關卡，現階段已進入高端新材料量產期。為增加一站式AI相關產能，集團計劃未來兩年投資過百億港元喺中國、泰國、越南建立新廠和擴產，AI新材料產值將可大幅提升。
其中特種電子玻纖紗和布係拓展重點之一。建滔上年於清遠建成可出產低介電常數電子玻纖紗窯爐，年產五百噸；今年上半年將再增加三個年產各五百噸高端窯爐，二○二七年之前再加八個，屆時園區共有十二個特種紗窯爐，滿足5G、6G、AI等高算力需求。由於市場需求遠遠超過現有產能，Paul認為新增產能可被客戶迅速搶購。現時客戶訂單以年計，甚至會包起一個爐幾年，佢笑稱做咁多年生意，從未試過有人包咗佢間廠，可見供不應求情況非常嚴峻。
內地無人駕駛日漸普及，道路上代表智鴐啟動嘅「藍燈」隨處可見，加上AI開放平台湧現，各項算力需求將會令高性能、高可靠性和高穩定性嘅高端覆銅板成為未來電子市場主流需求，建滔AI新材料產業鏈將一同受惠。
最近集團管理層經常被分析員問，AI新材料到底可帶來幾高價值？集團做咗價格對比，以玻纖紗為例，普通D450紗每公斤約五十元（人民幣，下同），第一代低介電紗可達二百二十元，第二代將可達一千三百多元。普通1080玻纖布每米賣七元，第一代低介電布逾二十七元，第二代跳到一百二十元以上。常規HTE銅箔每噸兩萬元，HVLP3超低峰值銅箔則可達到十一萬元。
中東戰火令多種原材料供應緊張，價格大升。建滔每月用十億港元買銅，但銅價急升下仍可憑競爭優勢，將成本轉嫁客戶之餘，更因本身儲備充足可應付需求，利潤不跌反升。另Philip指原材料之中只有溴素產自死海，略受影響，但因半年前已開始儲備原材料，目前為止供應並無影響。
