我通常早上會自己煮早餐，其實是煎兩隻蛋，飲杯暖水，家務助理話同我煎蛋，但我嫌佢煎得唔夠好，助理向老婆投訴，唔明白點解我可以用咁少油，將兩隻雞蛋煎得咁好，燶邊暖黃，正式是外脆內軟，老婆問我，我話用心就可以做到，如果用心，賀歲片都可以拍到好好睇。
有人問我，香港最旺是那個時候，我叫佢睇《夜王》，當時，真係好容易搵錢，而且搵到錢的人又捨得使錢，令到娛樂事業非常旺，點樣旺？那些公關小姐，如果沒有不良嗜好，半年收入就可以買一層黃埔花園，一年就可以在太古城買一個單位。當時我住太古城的大單位，隔籬就是一個公關小姐，我要供樓，她全款買，但我唔明白，既然咁容易搵錢，但點解那位公關小姐要做咁多年，仲要大場轉細場，做到俾人踢都唔肯走。
我問夜王，那些公關小姐搵到啲錢，究竟去晒邊？夜王話，如果個個小姐都唔使錢，很快就唔使做，夜場就冇公關小姐。所以，一定要教那些小姐使錢，在塘西風月年代，鴇母會教那些小姐吸毒，一但上癮，就會做到死，但在夜王時代唔會咁陰公，夜王會教那些小姐去澳門賭錢，或者倒貼姑爺仔，甚至雙翼齊飛，搞到啲小姐冇晒錢，甚至欠大耳窿錢，咁樣那些小姐就會一直做落去，做到唔可以做為止。
有人質疑，《夜王》中的結衣是不是真的，香港人唔通真係咁鍾意日本妹？其實是真的，不過結衣不能稱為日本女仔，只能稱為日式女仔，日式代表最高端消費，當時食日本餐，人均消費比現在還要貴，食品就差不多，大家唔好以為飲十四代，所以消費才咁高，當時很少人識得十四代，大多數飲菊正宗，如果現在去食日本餐飲菊正宗，真係打交都似。
夜王當打的年代，最奢侈消費並不是中式舞廳，而是日式夜總會，中式舞廳插飛仔，貴極有限，日式夜總會就講街鐘，簡稱full，晚上九點入場之後，夜王手下就會帶一批小姐入嚟，大家坐好揀好，夜王十五分鐘後就會入嚟問大家啱唔啱，如果啱就要埋街鐘，有時啱都冇用，夜王會話小姐已經有人有興趣，不過大家可以競投，於是兩個full、三個full一路競投下去，我見過二十個full，千幾蚊一個full，那些公關小姐點會唔容易買樓。
有人話，現在已經唔見晒那些日式夜總會，夜王以及那些公關小姐豈不是冇得撈？大家又不用擔心，其實仲有一些沒有公關小姐的小型私竇，客人在到達之前會叫夜王Omakase，夜王收到order便因客人消費而搵合適的公關小姐，而且做埋外賣小哥，負責接送那些小姐。所以，當大家點外賣時，覺得那些外賣公司真係好有諗頭，其實，大多數人唔知道，原來夜王早已做了外賣小哥。
