（後排左至右）涂國彬、黃敏碩、阮子曦及溫傑。
自美國總統特朗普再度執政後，當地政策朝令夕改，市場憂慮或導致美元資產加速外流。根據LSEG Lipper數據反映，美國本土投資者正逐步撤出美股市場，單計今年年初至今，淨流出金額已達五百二十億美元，為二○一○年以來首八周最高紀錄；同時部分外流資金轉投新興市場、歐洲和日本等區域。
不過聚焦美股盤面，今年開局表現強勢，總計一月三大指數齊升，「一月效應」再受關注，意思指一月升市，往往預示全年有八成機會迎來牛市。今輪升勢主要受美國經濟數據整體向好，失業率輕微回落等因素帶動。今期繼續同股評老友點評馬市走勢，包括王道資本及家族資產管理執行董事黃敏碩（Michael）、永豐金融資產管理董事總經理涂國彬（Mark）、香港股票分析師協會理事溫傑（Kenny），以及華富建業證券投資策略聯席總監阮子曦（Harry）。
今年美股能否繼續牛氣沖天？幾位專家都認為取決於往後利率政策走向，尤其今年五月聯儲局主席換屆，其獨立性備受關注，加上中期選舉將於十一月舉行，預料屆時美股波動性較大。其中Michael預計今年美國減息步伐將會放慢，最多減兩至三次；佢亦留意到近期美債孳息率走高，三十年期債息一度升至四點九厘，加上美元偏弱，或降低美股吸引力，有利資金回流亞太股市。
呢幾年「科技七雄」（Magnificent 7）雄霸美股，不過近期表現開始分化，去年五隻均跑輸大市，包括微軟、Meta Platforms、蘋果、亞馬遜及Tesla。彭博數據顯示，預計Magnificent 7今年盈利年增長僅約百分之十八，為二○二二年以來最低。相比美股，Harry更睇好台灣同韓國科技股，並認為港股估值仍偏低，可留意AI硬體、上游資源等板塊。
今年開局可謂多事之「春」，地緣政治局勢急劇惡化，中東戰雲密布、委內瑞拉政權動盪、格陵蘭等議題一波未平一波又起，市場避險情緒高漲，帶動資金湧入金市。多間大行亦相繼上調黃金目標價，預期將上試約五千四百至六千美元水平。Mark直言，只要特朗普一日係美國總統，金價就會一直創新高，加上各國央行持續吸納，往後金價有望繼續爬升，籲散戶可分段吸納作中長線投資。
至於港股走勢，Kenny回顧去年有兩輪主要升浪，上半年由DeepSeek作為催化劑帶動，市場偏向情緒主導；下半年則主力流向高息股。至於今年港股能否延續升勢，佢話關鍵在於企業盈利表現，尤其科技股面對競爭加劇、補貼減少、潛在罰款及增值稅等因素，業績或未如理想，加上下半年外圍波動可能加劇，或制約港股表現。各股評普遍上望恒指三萬點，建議兩萬五左右可分段部署，同時多元投資，傾向科技股、公用股、金融股，以求進可攻退可守。
