玄學名家羅奇峰（右）。
恭喜發財，我祝願各位東周讀者身體健康、馬到功成、財源滾滾丶吉星高照。踏入丙午馬年，請嚟老友記玄學名家羅奇峰（Raymond），以玄學角度同我哋把把脈，睇下今年有乜嘢機遇。
陸：雖然我唔識玄學術數，但今年成日聽人講「赤馬紅羊」會好大件事，到底係咪真嘅呢？
峰：大家之所以擔心赤馬年，係因為現時係下元九紫離火大運，加上今年嘅天干地支組合係六十甲子裏面最旺嘅火流年，可謂火上加火。由於有本古籍《丙丁龜鑑》，記載咗但凡赤馬紅羊年份，就特別多天災人禍，所以有人驚今年會出現好多問題。不過，根據歷史統計，赤馬紅羊年份出事嘅機會率大概五成二，實際有啲年份都係相安無事。
陸：咁以你嘅專業意見，今年究竟係相安無事，定係應該要嚴陣以待？
峰：或者咁講，我覺得今年並非風平浪靜嘅一年。政治上，世界各國擦槍走火屢見發生。至於投資市場，今年亦會非常波動，大上大落格局會不斷出現，好似年初金銀走勢已經係一個大象。而導致呢個局面出現，非因有太多「黑天鵝」，而係一直喺度而大家又覺得無問題嘅「灰犀牛」，會突如其來衝撞過嚟，因而引發市場震盪。而導致呢個問題，除咗「赤馬」因素外，亦因天文大象「三王渦漩」（即天王星、海王星及冥王星同時出現轉宮轉度）引發磁場改變，令到本身既有存在嘅問題深化及變質。
陸：如果聽你咁講，投資市場潛在風險唔低，不過我自己認為有危就有機，尤其是金融海嘯後，市場資金氾濫，總唔會一面倒無回頭路。反而過去幾年但凡有大調整時，都係一次趁低吸納嘅好機會。但今年投資要注意咩時間？
峰：今年有一個特點，就係有三次主轉折點嘅「水星逆行」，時間分別喺二月、六月及十月下旬。此外，今年入夏時間火氣極旺，都會影響整個大勢，所以呢啲時間，我建議投資策略上要保守啲。
陸：今年有咩板塊可以特別留意，等我哋喺危中有機年份把握好投資機遇？
峰：AI投資仍為投資市場主軸，不過AI內有不同小板塊，並非每塊都可以，情況一如年初時軟件股，因AI軟件發展一日千里導致大跌就係一個例子。由於今年大市會好波動，所以用主題式懶人包ETF去投資，一來可以避免個股急跌情況，二來可減輕大市波動嘅衝擊，三來亦可分散投資組合。
陸：講返香港股市，今年赤馬下會唔會有大影響？
峰：今年外圍亂，反而香港經過幾年整固，情況比較穩定，相對更易吸引資金流入，而呢個情況舊年下半年已經出現，對港股有唔錯嘅支持。當然，香港股市係外向型市場，點都受外圍因素影響，但整體上遇到明顯調整都係可以趁低吸納時機。當然，我仍然認為今年應以注碼嚟控制風險。
