港股現時處於牛市二期，走勢仍一浪高於一浪，即使年底小調整後都穩坐兩萬五關，預計牛市有望延續至二七年。
上年港股走勢漸入佳境，年初時Deepseek引領大市踏上首輪升浪，其後隨關稅戰衝擊逐漸消退，恒指緩步上揚。港股全年升五千五百七十點，二連升兼錄得八年以來最好表現。今年開局亦見理想，上月更一度逼近兩萬八大關，創逾四年半新高。進入馬年，後續投資方向如何？
港股自二○二四年起回復升勢，當時為牛市一期，現時則處於牛市二期，意味市場已累積一定升幅，但走勢仍一浪高於一浪，即使年底小調整後都穩坐兩萬五關。不過今年以來恒指好似升勢乏力，主要原因係中移動、騰訊、阿里巴巴等大價股同藍籌股等均未有明顯升幅，對恒指有一定阻力；但睇返非指數股或對指數影響力不太大嘅股份，其實升幅好犀利，特別AI、科技、資源等板塊尤其明顯。整體而言，預計牛市有望延續至二○二七年。
近年內地推出一攬子金融政策，內銀、內險、券商板塊相繼炒高。其中內險股去年牛氣沖天，主要由於大部分險企於疫情後重整業務，並開始反映喺業績上；而去年A股強勢，亦帶動險企投資回報上漲。另受惠於政策紅利，包括放寬保險資金入市規則、加速長期投資改革試點，以及鼓勵大型險企將三成新增保費投資於A股，變相擴大險企資產配置空間。呢一、兩個季度，我繼續睇好內險股，包括年初推介嘅中國人壽（2628），雖然已經升咗好多，仍然係我首選，而落後嘅中國平安（2318） 則有機會追上。至於香港代表友邦保險（1299）過去幾年一直跑輸，直至去年開始同市場同步，相信今年有上升空間。
除傳統經濟，AI概念股席捲全球股市，不過我早前提到，美國AI公司燒錢速度驚人，市場關注其投資回報，反觀內地公司投資步伐相對審慎。另外，百度（9888）今年擬分拆旗下AI晶片業務崑崙芯於港交所上市。市場將崑崙芯比喻為國產版輝達，若分拆順利實行，對百度股價有提振作用。阿里巴巴（9988）AI業務則有較大協同發揮空間，加上旗下螞蟻集團有機會重臨香港上市，具重估潛力，而且本身財力夠厚，可支持資源投放。當然，揀科技股等於揀未來，因此要留意下一個戰場AI agent嘅發展，日後有機會再細談。
講股不得不提我向來有情意結嘅滙控（0005），集團曾因停派息一年令投資者失望，股價虛怯，但去年開始重振獅威，重返「紅底股」之列。近期升幅主要由於成功私有化恒生，市場憧憬兩者可產生更佳協同效應；加上近月地產市道回穩，恒生壞帳率或能緩和。預計滙控有望重現一百五十元歷史高位，加上派息比率目標五成，對食息一族有一定吸引力。
最後，我問Deepseek馬年祝投資者乜嘢好，AI畀嘅答案之中，「龍馬精神，慧眼識金」最合我心意，既注意健康又保持敏銳眼光，就將呢句送畀大家！
