上月下旬，香港發生了一場超級火災，當時我在廣州，火災仍然是三級，大家都以為是小事一件，以香港的消防能力，要撲滅一場超級火災亦非難事。但想都想唔到，三級火最後演變成超五級大火，最後奪去最少一百五十九人性命。不過，這場火亦睇到香港人財力、應變，以及善後工作的能力，還有香港人的同情心，令全世界刮目相看，我們當然叫這些是獅子山下精神。
有人話未見到我撰文講關於火災悲劇，我話一個笑話講第二次已經唔好笑，但悲劇會越講越悲慘，既然社會上已經不斷有人講今次火災，我不如關心一些大家未必留意的事。
香港天文台對於防風、防雨、防山泥傾瀉都很仔細，但並沒有仔細教大家防火，在古代就唔同，打更佬會不斷講「風乾物燥，小心火燭」，香港雖然有報道相對濕度和火災危險警告，不過，一般市民對濕度與火災危險警告沒有太大警覺性，只知道濕度越低，天氣越乾燥。大埔火災當日，相對濕度是十六至十八度，是八十年來最低，濕度低對大家來說是冇咁容易出汗，秋高氣爽，適合去旅行，但亦很容易引起火燭，原來濕度低隱藏咁大殺機。
香港各界為災民捐款已經超過二十億，不少人話，香港人真係有同情心，但慈善機構的負責人話今次慘了，由於各機構將準備要捐的款項給予大火災的災民，以後要募捐就要加一把勁，大家都應該明白一節淡三墟的道理。有心水清的朋友同我講，今次捐款人當中，發覺很少物業投資者，他們點解咁冷血？其實，物業投資者並不是冷血，不捐款原因是物業受到銀行追差額，很多都要做債務重組，如果樓市繼續向下，捐出去的錢隨時由銀行找數，如果現在捐款，唔畀銀行照肺就奇，如果在平時，物業投資者能夠集合的捐款起碼超過一億。
有人話，今次大火災，有不少印籍、菲籍外傭犧牲，估計以後很難請家傭來港工作。今次雖然有咁多家傭犧牲，但香港政府畀足賠償，每個犧牲的家傭可以獲得八十萬港元。那些打算去星馬的外傭點解唔嚟香港，以後，反而可以得到更多最優質的家傭來港工作，今次香港政府都算是以本傷人。
不過話分兩頭，其實現在在香港工作的家傭質素非常高，不少家傭是因為保護主人而犧牲，應該向他們致敬，大火災已經發生咗，講返轉頭都無用，唯有希望不再有下次，至於誰要負責，相信政府會向市民有一個交代。
