今年一月一日香港黃金交易所正式營運，上星期舉行首屆董事會就職典禮。黃金交易所前身係大家熟悉嘅金銀業貿易場，今年踏入一百一十五年，講返歷史原來一九一○年成立時叫做「金銀業行」，到一九一八年至改名為「金銀業貿易場」。
香港係四大黃金市場之一，「九九金」和後來嘅「九九九九金」係我哋本土品牌。
早排見到香港黃金交易所主席張德熙（Haywood），除咗恭喜佢帶領貿易場轉型至交易所，亦同佢講古論今。據張兄講，金銀業貿易場到一九七五年已經成為香港唯一嘅黃金白銀交易所。點解當時唔改名做交易所？佢講返當時冇人用「交易所」這個term，一般都係叫銀號之類，所以決定叫貿易場。
由貿易場轉型為交易所，當然唔係改名咁簡單，佢形容過程要先「過五關」。由原來社團轉為有限公司並唔容易，要將貿易場嘅業務、牌照、交易身份等等，轉去一間新註冊公司需要經過五個部門，包括財經事務及庫務局、政制及內地事務局（因為會員有選舉權）、公司註冊處、證監會和立法會。另外對內要游說會員同將貿易場規條除舊迎新，包括原有章程刪除咗三、四成。
過程咁艱辛都要註冊改名，一個最主要原因係正名。張兄認為，佢哋實實在在係香港唯一實物黃金白銀交易所，全球都有證券交易所，點解自己仲要叫貿易場？而且之前因為社團身份，想進一步拓展同世界接軌，外資機構對同社團合作會有所保留。公司化之後，企業透明度更高，監管更嚴謹，國際機構參與度更高、更直接。
香港係四大黃金市場之一，「九九金」和後來嘅「九九九九金」係我哋本土品牌，外國人知道「両」（tael）可能都係因為香港黃金交易。張兄更提到，每年農曆年後第一個交易日，整個亞太區交易第一口定價喺香港，全亞太區嘅黃金定價權亦喺香港。
而要保持呢塊金漆招牌，其中一重點係要優化黃金交易同令佢年輕化，因此貿易場幾年前設計推出數碼黃金。首先數碼黃金可以將黃金細化，切割到一克都得，再放上區塊鏈發數碼幣，而且有佢哋監管實物黃金，買家可以一對一兌換實物黃金。年輕人傾向網上投資，用手機app好容易可以買到一克金，賣出亦方便，仲可以隨時喺手機check價格升跌。另一方面，配合政府積極將香港打造為國際黃金交易中心，張兄覺得第一步可以先喺一帶一路鋪設一條「黃金交易走廊」，由香港擔當超級聯繫人角色，連結有黃金需求同供應嘅國家、投資者。
張兄同黃金結下不解緣，黃金對於佢嚟講係情人、事業？佢直言黃金係佢「救命恩人」，因為佢係冒險家性格，投資有賺亦有犯錯嘅時候，而因為佢一直持金，所以每次投資失誤黃金都幫佢保本，甚至因為剛好有升浪而抵銷大部分損失。講起至愛黃金，張兄有好多新諗頭，我亦祝港金所喺佢帶領下繼續金機在握、金通四海！
