特朗普最近對哈佛開炮，不少人認為與他的兒子不能入讀哈佛有關，特朗普的老婆照例否認，特朗普反而話哈佛生的水準太低，連2+2都唔知係幾多。
有老友問我，點解特朗普話哈佛生連2+2都唔識？我話真難答，我不是數學專家，老友亦不是，唔通真係負負得正，兩個唔係數學專家可以回答這個問題，其實老作就得，又沒有標準答案。
2+2等於4當時係人都知，但是兩個2可以在有需要時，以不同意識形態存在，例如2x2，2的2次方，甚至微完又積，才可以解決不同數學問題。如果死牛一面頸話2+2等於4，反而做唔到理想效果。
老友話唔係幾明，可不可以用另外一個方法解釋？或者都可以，例如H2O，大家都知道是水，如果以氣體存在，可以發揮無窮動力；以液體存在，能載舟亦能覆舟；以固體存在，則固若金湯。水對人類重要性，是根據環境以何種形態存在，一個人非常口渴，但H2O以氣體存在，那人終會渴死，如果以液體存在，就會被人稱之為金露。不過，我們兩人都認為特朗普話哈佛生唔識得2+2，其實是指哈佛生托鐵唔識得轉膊。
哈佛難道唔知道猶太人對美國政府影響很大，甚至控制美國政府，點解仲會容許哈佛生在校園內示威反猶太人，反以色列轟炸加沙？哈佛生應該在校園內示威抗議哈馬斯、巴勒斯坦，支持以色列轟炸加沙，咁樣做特朗普不但唔會話哈佛生連2+2都唔識，仲會話校園內言論自由，學術自由。但那一班哈佛生竟然日夜示威反猶太人，想唔俾特朗普踢出校都唔得，真係托鐵唔識轉膊。
本來唔關中國、中國香港，以及其他國家的事，只是針對支持巴勒斯坦，反對以色列的學生，但特朗普為表示一視同仁，不但停收國際校生，就讀於哈佛的六千幾個國際學生立刻要轉校，國際學生以後要入讀美國大學就要接受非常嚴格審查，包括個人社交媒體。咁樣做起了一個極壞先例，其他國家一定有樣學樣，世界變成獨裁主義。
其實特朗普咁樣做，真係錯到不得了，美國大學對國際學生最主要作用並不是提高他們的學術水平，而是宣揚美國文化，言論自由，學術自由，希望那些國際學生在美國受教育之後，日後可以影響他們的國家， 現在反其道而行， 不用太久，美國對其他國家影響力就會消失， 除非美國打算閉關自守， 否則，就會淪落為一個沒有影響力的軍事經濟大國，對美國來說，應該是失敗而非成功。
