有老友話趙心童剛剛在英國贏得士碌架世界大賽冠軍，究竟士碌架是乜東東，是否應該是桌球？不過香港桌球室英文名字的確是士碌架，點解咁奇怪？
趙心童剛剛在英國贏得士碌架世界大賽冠軍。路透社
士碌架只是桌球中的一種戰術，就好似足球戰術長傳急攻或者雙翼齊飛，但不能話長傳急攻或者雙翼齊飛是足球，而士碌架的意思就是唔准對手打到需要打的波，如果對手打唔到，最少要扣四分。不過，年長一輩的香港人都唔知甚麼是士碌架，我小時候來香港打桌球比賽，好畀心機set了對手一個士碌架，誰不知對手輕描淡寫打個白波，只要撞邊兩次而又可以睇到要打的波，就算是救了士碌架，都唔合國際慣例，香港人的士碌架技術又點會進步。
雖然在英國舉行的叫士碌架世界大賽，但其實現在所謂的士碌架基本上名存實亡，並不是現在不用救士碌架，而是現在的球員技術非常好，救士碌架是等閒事，趙心童在決賽時與對手馬克威廉斯打了三十局，趙心童以十八比十二取勝，但雙方都唔知道有冇做過十個士碌架，就算有做到士碌架都很容易被救到，除非是士碌架最高境界，否則是自己唔小心失分比對set士碌架為多。甚麼是士碌架最高境界？講大家都未必相信，係佛偈嚟架，叫一葉蔽目，不是令對手打唔到需要打的波，而是任何一個波都打唔到。今次趙心童亦有表演一葉蔽目，威廉士打了幾次才打到要打的波，輸了這個士碌架之後，威廉士還輸了氣勢，趙心童攞世界冠軍就理所當然。
特朗普如果明白甚麼是一葉蔽目，就唔會向中國發起關稅，特朗普對中國開徵關稅，目的是唔准中國貨物輸往美國，但特朗普可能唔知道，輸往美國的貨物只佔中國的輸出量百分之十一至十四，就好似set一個士碌架一樣，對方有百分之八十六至八十九打到指定的桌球，set嚟都冇用。特朗普應該一葉蔽目，禁止中國貨物輸往所有國家，才可以令中國屈服，如果做唔到就唔應該向中國徵收關稅，否則就會浪費自己的人力物力，美國人又受到損失。
最奇怪就是特朗普除了向中國set士碌架之外，同時亦向全世界set士碌架，即是向全世界徵收關稅，概念的確唔錯，可惜知易行難，而且向全世界徵收關稅即是set自己士碌架，全世界都唔向美國供貨，最後令到美國超市的貨架空空如也，受到最大損失的始終是美國人。唔通特朗普唔明白，士碌架的意思是set死對手而不是set死自己。
