港人平均壽命冠絕全球，統計處最新數字顯示，男女平均預期壽命分別增至八十二點五歲同八十七點九歲，意味人生下半場逐漸延長，除咗投資儲養老金，投資於健康都係大勢所趨。香港保健食品協會去年委託中大進行調查，推算調查前六個月內全港六成三成年人口曾服用保健食品，服用者每人每月平均支出約七百八十元（港元，下同），估算香港半年支出共約一百八十五億元。內地保健品市場亦不斷增長，估計二○二四年市場規模達二千三百億元人民幣，可見追求健康係共通趨勢。
澳至尊主席兼創辦人蔡志輝（右）。
不過，保健品市場競爭激烈，商家要突圍而出都要靠宣傳。廣告媒體監察公司admanGo公布，去年香港廣告開支總額約二百九十八億元，按年下跌百分之一點三；而最捨得花錢落廣告嘅行業，仍然由銀行、醫藥同家品穩佔三甲。處於社交媒體時代，數碼營銷係另一推廣渠道。主打澳洲健康食品嘅澳至尊（2031）近年就憑抖音進軍內地市場，喺平台上發布短視頻，並邀請網紅合作，以提高品牌喺內地知名度。
澳至尊由創立至今逾廿載，早前揾集團主席兼創辦人蔡志輝（輝Sir）上我節目，回顧創業故事順道分享業務大計。呢個創業旅程要追溯至二○○一年，輝Sir原本係中學教師，喺佢蜜月旅行中，兩夫婦舟車勞頓之下雙雙病倒，當時初嘗澳洲蜂膠，點知食完之後身體迅速復元，由此萌生創業念頭。佢經過親身體驗，覺得澳洲保健品代理市場大有可為，就以兩萬元起步。
輝Sir兩夫婦基層出身，無人脈、無經驗，開業不久先後遇上沙士、金融海嘯等風浪，加上當年唔少港人仍然抗拒食保健品，甚至視之為藥物，銷情未如理想。輝Sir於是老師上身，決定要由教育出發。為提高大眾對保健品認知，佢向澳州廠商索取資料，積極研究成分，又報讀營養學、保健品等相關課程，增加自身對保健品知識，並親身落舖將資訊傳遞畀顧客，提高客戶信心。
直至二○一六年，澳至尊業務陸續上軌道，兩夫婦決定將公司上市，成為全港唯一主板獨資上市嘅西式保健品公司。公司股票號碼亦暗藏暖意，「二○三一」原來係佢哋一對仔女嘅生日。集團邁進二十四周年，團隊已增至二百多人，由起初五款產品擴展至過百款；從一個小小專櫃，發展至近二十間門市及百個專櫃，業務版圖擴至中國內地、香港、澳門及新加坡等。
目前市面上保健產品五花八門，不過質量參差。輝Sir認為價格戰並非長久之策，只有比拼質量至見真章，因此要提升競爭力，唯一辦法係提升產品質素，當顧客真正體驗到產品功效，先至儲到「返頭客」。另外，健康唔係單靠保健品，因此集團積極推廣運動及正面生活態度，例如舉辦慈善跑，既可宣揚運動健體，亦有助鞏固品牌形象。
