近日有一個壞習慣，就是每日要睇白宮發言人萊維特講特朗普豐功偉績，點解我話要睇，首先，睇新聞比聽新聞實在，其次是萊維特的表現，牙尖嘴利，典型美國白種女仔風格，但又不得不佩服她，當大家坐定定睇萊維特發言時，發覺螢光幕竟然出現英文字幕，老實說，如果唔睇字幕，很多時都唔知佢噏乜，用字實在太深，不過是用得恰當，就算明知佢是替特朗普講好說話，甚至指鹿為馬，但仍然覺得萊維特好叻，相信有不少人對萊維特的說話是深信不疑。
白宮發言人萊維特。路透社
有人話萊維特只是背稿，沒有甚麼大不了，我都知佢背稿，但背得咁純熟，而且是日日背，實在是太難，而可以背得咁順的原因，很可能那些稿是由她自己撰寫，如果要寫稿，仲邊有時間湊女。
有人唔明白點解我話萊維特指鹿為馬，原因是她表示在四月二日，特朗普向全世界開徵對等關稅當日，是美國被剝削的日子成為過去，全世界譁然，美國唔剝削其他國家已經是萬幸，點會被其他國家剝削。如此說來，任何人到美國投資買樓買股票，做生意賺了錢都是剝削美國，但萊維特處之泰然，不得不佩服。
萊維特在白宮發言，除了表達特朗普的意願之外，還要替馬斯克的狗狗部門保駕護航，狗狗部即是政府效率部，任何公司一定有冗員，愈大公司愈多，愈大國家愈多，這是無可避免的事，所以，久唔久就要搵一個金刀手，將一些冗員炒魷，特朗普的金刀手就是馬斯克，老實說，馬斯克真係肯捱義氣，在接到任務之後，他的特斯拉股價下跌了三成多，但從萊維特的發言，知道是有成效，但亦有不少人擔心，美國政府炒了咁多人，會不會出現動亂。
萊維特話，四月二日，美國被剝削的日子已成過去，我相信除了特朗普以及他的幕僚之外，大多數美國人都不同意，環球化是美國提出，將自己生產線移至國外，美國商人只保留最重要零件或者工序，將成本壓至極低，令美國人可以用在美國生產成本都不夠的價格買到商品，咁樣叫做剝削就冇得好講。在大幅增加關稅之後，美國人就會領略到物價上升，特朗普MAGA之苦。
萊維特話美國工業前途一片光明，工人有工做，薪金上升，貨物在美國生產，物價下跌，講到美國好似烏托邦一樣。其實，只有一個行業欣欣向榮，做律師的人發達了，在生產線搬回美國之後，一定會有數之不盡的賠償糾紛，天文數字的賠償金額，律師就搵大錢，但就會令到不少生產商要撤離美國，即使要畀關稅都仍然比在美國生產為佳。到時候，又唔知萊維特點樣演繹。有人話，既然我唔鍾意，點解又要睇白宮新聞，他們唔知道，我當娛樂新聞咁睇。
