財爺最新的《財政預算案》出台，一如所料，有不少人唔滿意，就算連內地人都批評，點解政府公務員唔減薪，以及降低二元乘車優惠，今次真係吹皺一池春水，關你鳥事。預算案只推出八幅土地供應，涉及四千四百五十個單位，我認為太少，因為樓市出現供應不足現象，如果唔加大供應量，樓價很快就會飆升。不過，相信我的人不多，反而有政界人士呼籲政府停止賣地，解決供應太多，樓價下跌的問題，將供應不足變成供應太多，結果將會是樓價飆升，政府最終又要出招打擊樓市。
有人話，未來三至四年的潛在供應量（一手私樓）有十萬〇八千個單位，如果繼續供應土地，都唔知點樣消化，政府既然用得潛在供應量，代表供應不足，給市民一個保證，包括貨尾單位，在未來三至四年有十萬〇八千個單位，叫大家不用擔心，就好似一大班人在酒樓食飯，發覺唔夠飯，老闆叫大家不用擔心，新煲以及現有的飯，足以令每一位顧客都飽肚。如果政府改變用詞，將潛在供應量改為貨尾單位，大家就要小心，唔好講十萬〇八千個咁多，就算是幾萬個貨尾單位，都足以令樓價下跌。
有人話，現在不時有劈價蝕讓，如果政府繼續賣地，樓價豈不是雪上加霜？大家可能唔知道，劈價蝕讓的交易並不是由業主賣樓，而是由銀主賣樓，一般銀主都是心狠手辣，不但劈業主價，甚至連自己都劈，不少劈價蝕讓的交易，不但業主要蝕錢，甚至連銀主也要蝕錢。即使如此，樓價在這幾個月仍然可以保持平穩，相比去年九月的最低點仲有百分之一距離，換句話說，有很多住宅單位都是以高於市價成交，只要銀主盤減少，樓市就會飆升，就算唔升都唔會繼續下跌。
一個城市的樓價是否會上升，很大機會取決於人口增長，在疫情這幾年，香港減少超過三十萬人口，政府又沒有作出有效補充，樓價又點會唔跌？在疫情之後，政府調整人口政策，人口回復增長，樓價下跌的速度放緩。
有人話，人口增長對香港樓市沒有作用，那些人是唔會買樓，樓價繼續下跌。其實唔可以咁講，雖然樓價並沒有上升，但租金已經連升超過二十個月，租金上升最終都會令到樓價上升。
至於點解我會話土地供應不足？是有根據的，一般來說，一個新樓盤入伙，即使早已沽清，但最少都要用兩年才可以住滿人，但現在有一些新樓盤，在入伙之後兩三個月便已經住滿人，期間租金不斷上升，這是一個供應嚴重不足的警號，如果現在叫政府停止賣地，真係會害死政府。
