一月二日返工，股市開市大跌五百點，雖然隨後跌幅收窄，在中午仍然下跌接近三百點，有同事問，今年股樓的表現如何，外面大多數評論員都睇好股市，睇淡樓市，他們認為恒指可以上升到二萬五千點，大約升百分之二十五；至於樓市，睇升的評論員不是很多，但亦不會睇得太淡（大約跌百分之五），而且是先跌後升格局，究竟大多數評論員的預測是否準確？
老實說，未到年尾，我都唔知評論員的預測是否準確。不過，我認為今年股樓都會有一定升幅，股市升百分之二十五可能比較樂觀些少，但十至十五個巴仙應該冇問題；至於樓市，雖然大多數評論員不樂觀，但我認為樓價會上升一成，前提是當樓市上升，那些沒有樓的人唔好要求政府出招打擊樓市，因為很多人見到樓價上升，都會正義凜然要求政府出招，但我估計政府在二〇〇九年錯誤出招之後，最後搞到香港出現財赤，應該唔會再出招，而事實上最好招式是增加供應，其他辣招都是旁門左道，既然已經集中火力搞北部都會區，又何須出招打擊樓市。
很多人唔明白點解樓市評論員睇好股市，而股市評論員睇唔好樓市，原因是大多數樓市評論員都持有股票，而很少股市評論員持有物業。所以，他們在行動上必定睇唔好樓市，否則就會俾人話口是心非。
雖然一般人都睇好港股，但亦有一些危機，因為美股對港股影響甚大，美股跌，港股很難獨升，反之美股升，港股可能會下跌，我認為美股今年下跌的機會較大，希望唔會出現衰退式下跌，否則港股想升都難。換句話說，港股是否上升並不是睇本身表現，而是要睇美股眉頭眼額，但港股本身是正面的，而且有相當多港股的資產淨值大幅高於股票市值，如果那些股票不是欠一大筆債，就算唔升都唔會大跌。
同事話大多數玄學家都話樓市唔掂，點解我會話升一成？其實這是玄學家一貫做法，如果某人去睇相，先生一定唔會話那人順風順水，因為他知道，順風順水的人唔會下馬問前程，所以一定會話那人會遇上困難，不過，假以時日，一定可以化險為夷，玄學家亦以這個態度講樓市，最後出現近兩三年樓市不景，以後就會轉好這個說法。
老實說，如果今年樓市下跌就真係大件事，因為所有不利樓市因素已經消除，辣招冇咗，優質常住人口將會大幅增加，租金上升，利息就算唔跌都唔會上升，只要銀行願意借錢畀人買樓，樓價就會上升，如果在咁好環境下樓價仍然下跌，樓市就永無翻身之日。
