在歐洲國家盃四強對壘之前，同事問我有冇心水，我話決賽將會由英格蘭對西班牙，並且身體力行，在賠率一賠三的時候，買了五千元，如果決賽由英西對壘，我會有一萬五千元，不過就冇得落袋，全部用嚟請同事食飯。

賽果一如我所料，英格蘭與西班牙在準決賽分別擊敗荷蘭同法國，在食飯的時候，有同事問我，平時都唔見我賭馬，點解會賭波，我覺得賽馬賠率不公平，所以從不賭馬，賭波比較合理，雖然長賭必輸，但輸得比較合理。

我讀中一時，有一日被一個長輩叫我幫幫手，入逸園賽狗場做賠率計算員，長輩知道我的珠算了得，不但識打算盤，仲識得三一三剩一，我話自己只得十三歲，點可以入賽狗場，長輩話賽狗當然唔得，但做賠率計算員就冇問題。

入到賠率計算房，見到全部都是年紀比較大的人，他們大多數在賭場做番攤荷官，一個賭場，最叻計數的應該是番攤荷官，他們猛計猛計，在一場完結之後才將賠率公布，換句話說，贏了的人在賠率公布之前，唔知道自己贏了幾多錢，所以，跑完一場賽狗之後，很多時聽到兩次噓聲，第一次是輸了的人噓，第二次是贏了的人噓，他們嫌賠率太低，贏得少，我了解之後，再提不起興趣賭狗，及後亦沒有賭馬。

今次我買歐國盃決賽由英格蘭對西班牙，賭錢與投資都是一樣，要睇值博率，一賠三，博得過，但如果是一賠二，我當然唔會買，但賭馬就唔同，雖然買的時候賠率很高，但買了之後見賠率係咁跌，仲慘過輸錢。

我見到賭仔去睇晨操，我認為浪費時間，但有賭仔話，睇晨操主要是睇自己心目中的馬匹有冇狀態，如果有狀態而值博率又高的話，便會重鎚出擊，我話除非等到截數一刻才落注，否則計到數都冇用，經常都買唔到，不過，睇晨操始終都是好事，話晒早睡早起身體好。

賽馬對早鳥不公道，不少馬迷深入研究，對某些馬匹有心得，賠率又理想，於是做早鳥，一早買定離手，買的時候是一賠十，但到臨場時已經是一賠五，開賽前一賠三，就算跑贏，一賠十與一賠三，真係蚊髀同牛髀，如果早鳥可以鎖死賠率，及後賠率繼續下跌，買了的人好似未跑已經贏咗，如果不能鎖定，見到賠率下跌，心理上未跑都已經輸了，馬會應該作出改革，否則賽馬就會被淘汰，澳門已經冇馬跑，到了今年十月，新加坡亦取消賽馬，如果賽馬可以鎖死賠率，激發投注人興趣，甚至令到更加多人賭馬，澳門新加坡兩地賽馬未必會執笠，香港若果唔想步兩地後塵，應該考慮鎖定賠率，至於點樣做就留返畀馬會話事人諗，足球可以，賽馬點解唔得？