今年三月底，電動車扣減首次登記稅計劃屆滿，之後寬減額會下調，好多想轉用電車嘅車主都匆忙趕喺限期前買車，以享有較高補貼，我都係其中之一。其實我一直都想轉電動車，但係睇咗好多款都唔啱心水，終於喺限期前揀咗一款七人車。轉電車除咗環保，計下條數每個月都慳萬幾蚊油費。

中達集團主席盧紹杰（中）。

由於之前一路睇車，對於電動車越睇越有興趣，有朋友邀請我去參加一個智能汽車合作項目發布會，我當然出席了解下。內地電動車市場火熱，亦有幾間從事下游業務嘅新能源車企，如哪吒汽車、寧德時代等落戶香港。呢個項目係中達集團（0139）同內地智能車品牌BYTON（拜騰）嘅合作，雙方成立合資公司，中達持有九成。

BYTON屬於一汽集團下面嘅品牌，簡介裏面提到品牌創立於二○一七年，一八年喺拉斯維加斯CES上首秀。公司其中一項專利發明係一點二五米闊嘅超大車載高清共享屏，另除咗實體開車之外，有手勢、語音、觸摸、手機控制等智能功能。

內地新能源車市場潛力龐大，但車企眾多，加上不少巨企跨界加入市場，競爭白熱化，於是三年疫情之後，車企面對嚴峻經營挑戰。拜騰公司同樣承受財政壓力，但中達集團主席盧紹杰解畫，正正係呢個市場空窗期令集團有機會促成合作，加入智能汽車市場。

合資公司將獲得BYTON品牌同相關技術嘅許可權，為期三年。由於拜騰首款汽車產品研發和工業化工作之前已經完成，因此合資公司行動迅速，計劃喺原有技術和產品基礎上盡快推進，希望三年內推出兩款全新車型，並於第三年啟動大型SUV車型開發。

研發工作之外，合資公司另一項任務係推動「電車出海」。拜騰喺內地一直同一汽集團夥伴合作，今次同中達合營將企業帶嚟香港，主要係睇中香港嘅國際化同金融優勢，希望鋪設海外產銷渠道，而首先計劃開拓東南亞市場。政府二○二二年公布《香港創新科技發展藍圖》，首次提出引入「新能源汽車」產業；去年《施政報告》再提出一系列政策措施，推動新能源交通產業，促進綠色經濟。

香港目標喺二○五○年實現碳中和，綜觀整體溫室氣體排放，運輸佔其中近兩成，係第二大排放源，因此政府積極推動新能源車發展。本地電動車普及率因而不斷提升，二○二二年新登記電動車佔比首次超越燃油車，之後市場佔比節節上升，目前普及率遠超其他亞洲地區。可持續發展大勢之下，相信新能源車仍有唔錯嘅發展動力同空間。