全球經濟先後經歷疫情、通脹和加息三座大山，各國零售需求疲弱。以歐美市場為例，上月兩大運動用品巨頭Nike和Lululemon不約而同宣布大規模裁員；而美國服飾零售商Express Inc更面臨破產，負債額達三百億元（美元，下同），計劃關閉逾百間門店，並將庫存減價促銷。事實上，品牌同生產廠商上年都受經濟下行影響。根據國際貿易管理數據庫，去年美國服裝進口量按年銳減兩成。

利華控股主席兼執行董事司徒志仁（右）。

不過亦有公司能夠突圍而出，例如主攻歐美市場嘅服裝供應鏈平台利華控股（1346）二○二三年全年業績再創新高，早前集團主席兼執行董事司徒志仁（Stanley）同我解構業績並分析市場走勢。

雖然集團去年全年收益輕微回落約百分之四，但純利卻反升百分之七，賺一千五百六十萬元，明顯跑贏大市。能夠取得佳績，公司輕資產營運策略應記一功。由於公司早年已由製衣轉型為服裝供應鏈平台，保留時裝設計、樣本開發、布料及配套原材料採購等服務，將生產外判予合約加工商。呢個模式有別於一般中介，因此能夠維持毛利率接近三成，對比同業屬高水平。而零廠房、低成本，亦有助緩衝市弱所帶嚟嘅風險，處於進可攻退可守位置。

近年貿易壁壘持續升溫，輕資產正正係一道逃生門，事關利華無固定工廠，加工商網絡分布東南亞及南亞地區，現時有逾百個合作廠房，客戶可靈活選擇生產地，大大減低地緣政治風險。論生產成本，東南亞屬最平之選，其中以越南合作廠房最多，大約佔三分之二，內地則佔兩成多，其餘位於孟加拉、柬埔寨、印尼及印度。

回顧去年市場局勢，Stanley坦言業界確處於庫存過高困境，由於前年疫後服裝需求一度急彈，唔少大型零售商均提前入貨，但其後又受制於高通脹同環球加息，購買力減弱，以致市場囤積大量存貨。因此陸續有中小型品牌要求細量多款，一般生產商唔會接呢類細單，但利華勝在夠多合作工廠，正能填補呢個市場缺口，同時可提高客戶粘度。

有見市道放緩，利華見機出擊，於上年九月成功併購一間戶外服裝企業，拓展供應鏈服務。利華由上市至今已完成六宗戰略收購，平均半年至一年就能發揮協同效應。目前公司處於淨現金狀態，帳面值約一千八百一十萬元，佔資產淨值三成三。銀彈充足下，派息亦見吸引，末期息派發六港仙，全年合派九港仙，截稿前周息率約十厘，業績派息俱佳，難怪股價喺短短一年多升兩倍，成功抗逆。