在政府撤銷打擊樓市的辣招之前，我與一班地產界朋友去唱卡拉OK，有朋友問，政府幾時會撤辣，老實說，莫講我唔知道，就算政府官員都唔知道，有資格做決定的官員就心大心細，擔心撤辣之後樓市冇反應，咁就大件事，更擔心就是樓價飆升，就會畀人話樓是用來住，並不是用來炒。所以，基本上冇人知道幾時會撤辣，但一定會撤，所以我話終有日，對方竟然跟着唱春風吹渡玉門關。

於是大家一齊唱異國情鴛驚夢散，唱完之後，有人問麥炳榮的番邦戰將，究竟是那個民族，當然冇人知，有人問AI，AI話根據地理位置，應該是匈奴，但根據編曲，應該是金國大將耶律君雄，本來編曲講邊個就係邊個，大家都冇得反駁，但點解會話終有日，春風吹渡玉門關。

如果我唔知道編曲的意思，我就會話麥炳榮的番邦戰將應該是羌人，根據王之渙「涼州行」所講，羌笛何須怨揚柳，春風不度玉門關，羌人同商朝交惡，不能進入玉門關，但紂王失了商朝之後，周武王恢復與羌人交往，羌人亦可以進入玉門關，而現在羌人是中國五十六個民族之一，不能視為外人，春風幾時吹渡玉門關都可以。

大家講完廢話之後，再講政府幾時會撤辣，我當時話冇一個時間表，主要是睇財爺本數簿，如果連續兩三年出現大額赤字，而政府又冇其他方法解決，唯一是撤辣；如果撤辣之後新樓買得好，地產商一定恢復買地，超過千億收入，赤字已經解決大半，再加上停止派發三百多億消費券，基本上財赤沒有了。所以，大家希望香港出現巨額赤字，政府才會撤銷所有辣招，令香港回復正常。

樓市撤辣後的表現，政府官員飲得杯落，無論新樓或者二手樓的成交量大增，但樓價並沒有飆升，就算唔想政府撤辣的人都冇嘢講。而撤辣之後，更多非香港人買樓，令香港人口回復增長，而且來港的人不是求學，亦是精壯當打之年，教育亦有一定水準，可以提高香港整體平均水平，畢竟我們有很多受過本科教育的精壯人士移民去了英國，如果沒有適當補充，最後受損的也是香港。

樓價下跌，不少只得一個自住單位的業主變成負資產者，他們其實是辣招下的悲劇，在辣招之下，只有初次置業者才不用繳付辣招稅，理論上在沒有競爭之下，那些人比較容易買樓，現實就是購買力不足，供應大過需求，上咗車很容易變負資產者，那些人欲哭無淚。取消辣招多多少少都給那些人一個希望，樓價很快就會回升至他們的買入價，不用做負資產者。

影響香港樓價除了辣招之外，還有利息高企以及香港銀行不願意借錢畀人買樓，我認為不用太擔心，雖然剛剛過去的美聯儲局議息沒有減息，但已經釋放強烈減息訊號，銀行亦不會永遠不做生意，唔會永遠當客戶係仇人，終有日，春風吹渡玉門關。