在一個月前，如果有人問我台灣總統選舉，究竟邊個會贏，民進黨賴清德抑或國民黨侯友宜，民眾黨柯文哲應該冇機會，我認為民進黨一定會贏，不過是贏波輸盤，民調就贏晒，但選舉就會輸，主要是台灣年輕人唔敢面對武統，唯有用民調來表達他們的意願，如果結果是這樣就還得神落，萬一賴清德贏了就大件事。

其實風險是非常之高，即使賴清德搵了一個半唐番蕭美琴做副手，但民調仍然大幅領先，當時民進黨有百分之四十支持，其次並不是侯友宜，而是柯文哲，大約在三十巴仙左右，些微領先侯友宜，咁嘅情況，冇人夠膽講民進黨會贏波輸盤。

如果大家以為民進黨一定贏梗，再唔理台灣總統選舉，今日再睇民調就會覺得很奇怪，點解國民黨可以追返咁多，與民進黨只是相差百分之三，仲有大半個月，隨時可以追到民進黨，再睇真啲，原來國民黨搵了趙少康做侯友宜做副手。老實說，趙少康年紀比侯友宜大，知名度亦比侯友宜高，如果不知道內裏乾坤，一定以為趙少康是正，候友宜是副，不過都冇所謂，最緊要是贏得大選。

三十年前趙少康已經選台北市長，失敗而回，唔通真係老驥伏櫪，再度出山競選，睇返當年趙少康選台北市長的選舉政綱，是以年輕人為主，而事實上所有候選人都應該關心年輕人，並不是有甚麼特別，失敗亦是意料中事，但可以蟄伏三十年就的確出奇。不過，趙少康亦沒有離開政治，他做政治評論員，而且做得非常出色，亦很中肯，藍綠都接受，如果賴清德副手係趙少康，我相信民進黨民調一下子就會過一半，民進黨繼續執政的機會亦很大。

在趙少康出任侯友宜副手之後，國民黨民調飊了上去，趙少康一定有功勞，但我講大家都唔會相信，香港亦有功勞，國民黨推出兩項利民的房屋政策，第一項針對有樓的退休人士，叫以房養老，用自己物業來擔保餘生生活費，在香港叫逆按揭或者安老按揭。

第二項叫以房養貸，當中包含一個555計劃，簡單來說，是協助年輕人買樓的高成數按揭計劃，在香港是大家鬧爆的林鄭Plan，不過，台灣年輕人很接受，就是這兩個房屋政策，就將國民黨的民調拉高，如果國民黨贏得總統選舉，香港政府都可以沾到些少光彩。

有人話，民進黨冇理由咁蠢，明知辦法可行，點解唔納入政綱，唔講唔知，民進黨人士亦熟讀毛主席語錄，知道凡是敵人贊成的，我們必須反對，既然香港人用了逆按揭以及林鄭Plan，民進黨就唔用，費事畀人誤會是跟住香港走。